Maliyyə

Ana səhifə

Maliyyə

Avropa Yenidənqurma və İnkişaf Bankı gələn il Qərbi Balkan, Qafqaz və Orta Asiyada regionuna xüsusi diqqət yetirəcək

21 noyabr 2008 10:51 (UTC +04:00)

Bakı. Nicat Mustafayev – APA-Economics. Avropa Yenidənqurma və İnkişaf Bankı (AYİB) qlobal iqtisadi böhranın ciddi təsirinə cavab olaraq 2009-cu ildə Mərkəzi və Şərqi Avropa regionuna investisiyaları əsaslı şəkildə artırmağı planlaşdırır.
«APA-Economics»in məlumatına görə, AYİB-in prezidenti Tomas Mirou bankın səhmdarlarına 2009-cu il üçün 7 mlrd. avroya qədər investisiya qoyuluşuna dair təklif göndərib. Bu məbləğ bankın fəaliyyət göstərdiyi müddətdə bir il üçün nəzərdə tutulan rekord sərmayə qoyuluşu olacaq.
AYİB bir qayda olaraq əlavə maliyyələşməni ən azı 2:1 nisbətdə kommersiya tərəfdaşlarından cəlb etdiyindən, 2009-cu ildə ümumi maliyyələşdirmə 20 mlrd. avronu üstələyə bilər.
Bankın yaydığı məlumata görə, xərclərin artım planı G-20 ölkələrinin beynəlxalq maliyyə təşkilatlarına noyabrın 15-də ünvanlandığı cari böhranla mübarizə məqsədi ilə tam güclərin səfərbər olunması ilə bağlı müraciətinə cavab olaraq irəli sürülüb. Bu plan 2009-cu il üzrə nəzərdə tutulan investisiya xərclərindən 1 mlrd. avro və ya mövcud plandan təxminən 20% çoxdur.
Əlavə investisiyalar 2009-cu ildə əsasən Qərbi Balkan, Qafqaz və Orta Asiyadakı zəif inkişaf edən iqtisadiyyatlara yönəldiləcək.
Qeyd edək ki, AYİB regionda fəaliyyət göstərən 100-ə qədər maliyyə təşkilatının səhmdarı və 200-dək təşkilatın kreditorudur.
Xatırladaq ki, Azərbaycan 1992-ci ildən AYİB-in üzvüdür. Bu günə kimi AYİB Azərbaycanda ümumi dəyəri 1 mlrd. dollardan artıq olan 50-dən çox investisiya layihələsi imzalayıb. Bank əsas diqqətini dayanıqlı maliyyə sektorunun inkişaf etdirilməsinə, mikro, kiçik və orta sahibkarlığın dəstəklənməsinə və qeyri-neft özəl sektorun inkişaf etdirilməsinə yetirir.