Maliyyə

Ana səhifə

Maliyyə

Aftandil Babayev: «Azərbaycanın bank sektoru dünya maliyyə böhranının qarşını alacaq dərəcədə davamlıdır»

25 noyabr 2008 11:55 (UTC +04:00)

«APA-Economics»in məlumatına görə, tədbirdə AMB-nin İdarə Heyətinin sədr müavini Aftandil Babayev çıxışında bildirib ki, tədbirin keçirilməsində əsas məqsəd maliyyə böhranı fonunda Azərbaycanın bank sektorunun hazırkı vəziyyəti haqqında ətraflı məlumat verməkdən ibarətdir. «Son vaxtlar ölkənin bank sektoru haqqında bəzi mətbuat orqanları həqiqəti əks etdirməyən məlumatlar çap edib. Bu yanlış məlumatlar isə ölkədə fəaliyyət göstərən biznes strukturlarının nümayəndələri və digər iş adamlarının fəaliyyətinə təsir göstərə bilər. Mən qeyd etmək istəyirəm ki, hazırda Azərbaycanın bank sektoru bu böhranın qarşını alacaq dərəcədə davamlıdır. Bütün banklar böhrana qarşı davamlı şəkildə fəaliyyət göstərir», - deyə AMB rəsmisi vurğulayıb.
A.Babayevin sözlərinə görə, Azərbaycanda əhalinin banklarda olan əmanətlərinin həcmi 2008-ci ilin əvvəlindən 22,2% artaraq noyabrın 1-nə 1,784 mlrd. manat təşkil edib. Bu göstərici son bir il ərzində 34,3% artıb. Lakin bu ilin oktyabr ayında son 21 ay ərzində ilk dəfə olaraq bank əmanətlərinin həcmi azalıb, aylıq azalmanın həcmi isə 94,7 mln. manat və ya 5% təşkil edib. Bununla yanaşı bildirilir ki, 2007-ci ilin yanvar ayında əmanətlərin həcmi 84,2 mln. manat və ya 10,2% azalıb. A.Babayev əmanətlərin azalmasını iri həcmli əmanət sahiblərinin investisiya yatırımlarını birbaşa kredit hesabına deyil, öz vəsaitləri hesabına həyata keçirməsi ilə əlaqələndirib. O cümlədən, bir neçə əmanətçi banklarda saxladıqları vəsaitləri (təxminən 18 mln. manat) həmin bankların səhmdar kapitalının artırılmasına yönəldilib. Qalan hissə isə banklardan götürülərək əmanətçilər tərəfindən investisiya yatırımları üçün istifadə olunub.
A.Babayev həmçinin bildirib ki, hazırda Azərbaycanın bank sektorunun məcmu xarici öhdəlikləri 2,2 mlrd. manat təşkil edir. Bu ilin yanvar-oktyabr aylarında isə Azərbaycan bankları tərəfindən 900 mln. manat həcmində xarici borcun ödənilməsi həyata keçirilib. Bunun 210 mln. manatı cari ilin sentyabr-oktyabr aylarında ödənilib.
AMB rəsmisi vurğulayıb ki, ümumiyyətlə, məcmu bank aktivlərinin 23%-i likvid vəsaitlərə aiddir və bu göstərici cəmi əmanətlərin həcmindən çoxdur.
Bununla yanaşı A.Babayev ölkədə antiinflyasiya tədbirlərinin də görüldüyünü bildirib: «Son aylar Azərbaycanda inflyasiyanın zəifləməsi müşahidə olunur. Bu tendensiya davam edərsə, illik inflyasiya səviyyəsinin 18-19% olacağı gözlənilir».
Son vaxtlar AMB tərəfindən uçot dərəcəsinin 15%-dən 10%-dək azaldıldığını xatırladan A.Babyev uçot dərəcəsinin cari ilin dekabr ayında da azaldılacağını bildirib.
AMB-nin Kredit təşkilatlarının fəaliyyətinə nəzarət Departamentinin direktoru Rəşad Orucov isə öz növbəsində ölkədə yeni bank təşkilatlarının yaradılması ilə bağlı müraciətlərdən danışıb. R.Orucovun sözlərinə görə, hazırda AMB-yə yalnız «AzFinance Bank»la bağlı müraciət daxil olub.