Maliyyə

Ana səhifə

Maliyyə

Azərbaycanın tədiyyə balansının müsbət saldosu 15 mlrd. dollara çatıb

27 noyabr 2008 08:18 (UTC +04:00)

«APA-Economics»in Azərbaycan Milli Bankının (AMB) ilkin məlumatları əsasında verdiyi xəbərə görə, bu göstərici cari ilin ilk yarım ilinin nəticələri ilə müqayisədə 2,5 dəfə çoxdur.
Tədiyyə balansının bu dərəcədə yüksəl müsbət saldosu əsasən xarici ticarətin müsbət saldosu hesabına formalaşıb. Belə ki, cari ilin ilk üç rübü ərzində Azərbaycanın xarici ticarətində 33,7 mlrd. dollarlıq müsbət saldo yaranıb. Ümumilikdə, bu dövr ərzində ölkənin ixracı 38,971 mlrd. dollar, idxalı isə 5,231 mlrd. dollara bərabər olub.
Qeyd edək ki, Azərbaycanın tədiyyə balansında xarici ticarətdən başqa qalan təsnifatlar üzrə saldo daim mənfi olur. Bu təsnifatlara əsasən gəlirlər və xidmətlər balansı, investisiyalar, həmçinin investisiyanın repatriasiyası, kreditlər və s. balans bölmələrini aid etmək mümkündür.
Maraqlıdır ki, Azərbaycanın tədiyyə balansının «Cari əməliyyatlar hesabı»nın saldosu xarici ticarət üzrə saldonun hesabına müsbət olduğu halda, «Kapitalın və maliyyənin hərəkəti hesabı»nın saldosu daim mənfidir. Belə ki, cari ilin ilk yarısı üzrə bu göstəricilər müvafiq olaraq müsbət 9,71 mlrd. dollar və mənfi 3,66 mlrd. dollar təşkil edib.
Qeyd edək ki, Beynəlxalq Valyuta Fondun hesablamalarına əsasən, Azərbaycan 2008-ci ildə cari hesab balansın ÜDM-yə nisbətinə üzrə Küveytdən sonra dünyada ikinci yeri tutacaq. Azərbaycan üzrə bu göstərici 2008-ci il üçün 38,3%, 2009-cu il üçün isə 38,6% səviyyəsində proqnozlaşdırılır. Cari ilin ilk yarısı üzrə Azərbaycanda bu göstərici 32,4%, üç rübün nəticəsində isə 40,1% təşkil edib.