Maliyyə

Ana səhifə

Maliyyə

Azərbaycan İpoteka Fondunun fəaliyyəti üzrə auditin yekunları açıqlanıb

28 noyabr 2008 11:59 (UTC +04:00)

Bakı. Vahab Rzayev – APA-Economics. «Baker Tilly Azerbaijan» şirkəti tərəfindən Azərbaycan İpoteka Fondunun (AİF) 2007-ci ildəki maliyyə-təsərrüfat fəaliyyətinin yekunları üzrə keçirilən auditin nəticələri açıqlanılıb. «APA-Economics»in məlumatına görə, auditin yekunlarına əsasən, 2007-ci ilin sonuna Fondun aktivləri 46,773 mln. manat, o cümlədən kredit portfelinin həcmi 45,622 mln. manat təşkil edib.
Bundan başqa auditdən keçmiş Fondun balansında əks olunan aktivlərin strukturunda 0,683 mln. manat Azərbaycan Milli Bankında müxbir hesabı, 0,384 mln. manat avadanlıqlar, 0,037 mln. manat qeyri-maddi aktivlər və 0,047 mln. manat sair aktivlərdir.
AİF-in kapitalının həcmi 2007-ci ilin dekabrın 31-i vəziyyətinə 46,655 mln. manat, o cümlədən dövlət büdcəsindən ayırmaların cəmi 46 mln. manat, bölüşdürülməmiş mənfəət isə 0,655 mln. manat təşkil edib. Fondun öhdəliklərinin həcmi isə 0,118 mln. manata bərabər olub.
Ötən ildəki fəaliyyəti nəticəsində Fondun gəlirləri 1,212 mln. manat təşkil edib ki, bunun 1,197 mln. manatı faiz gəlirlərinin payına düşüb. Fondun xərcləri isə 0,843 mln. manata bərabər olub və bunun 0,825 mln. manatı əməliyyat xərcləridir. Nəticədə, AİF 2007-ci ildə 0,369 mln. manat həcmində mənfəət əldə edib.
Azərbaycan İpoteka Fondu (AİF) 2008-ci ilin əvvəlindən 16,6 mln. manat məbləğində ipoteka kreditləri üzrə yenidən maliyyələşməni həyata keçirib.
Qeyd edək ki, 2005-2008-ci illərdə müvəkkil kredit təşkilatları tərəfindən Fondun şərtlərinə uyğun 67,9 mln. manat məbləğində ipoteka kreditləri verilib. Ayrılmış kreditlərin 63,3 mln. manatı artıq AİF tərəfindən yenidən maliyyələşdirilib. Qalan ipoteka kreditləri isə «Azərbaycan Respublikasının Milli Bankı nəzdində Azərbaycan İpoteka Fondunun vəsaiti hesabına ipoteka kreditlərinin verilməsi Qaydaları»na uyğun tələb olunan sənədlər AİF-ə təqdim edildikcə müvafiq qaydada yenidən maliyyələşəcək. Bu müddət ərzində dövlət büdcəsində Fondun şərtləri ilə verilən ipoteka kreditlərinin yenidən maliyyələşdirilməsi məqsədilə 80 mln. manat məbləğində vəsait nəzərdə tutulub ki, bunun 68 mln. manatı artıq büdcədən Fonda köçürülüb. Cari il ərzində dövlət büdcəsində ipoteka kreditlərinin maliyyələşdirilməsi üçün nəzərdə tutulmuş 34 mln. manatdan 22 mln. manatı artıq AİF-ə köçürülüb.
Xatırladaq ki, AİF 2005-ci ilin sentyabr ayında yaradılıb. Azərbaycanda ipoteka kreditlərinin maliyyələşdirilməsi mexanizmini yaratmaq məqsədilə 2005-ci ilin dekabrın 22-də Fondun əsasnaməsi təsdiqlənib.