Maliyyə

Ana səhifə

Maliyyə

Avropa Yenidənqurma və İnkişaf Bankının bir qrup rəsmi təmsilçisi Cənubi Qafqaza səfər edib

01 dekabr 2008 09:52 (UTC +04:00)

Bakı. Nicat Mustafayev – APA-Economics. Avropa Yenidənqurma və İnkişaf Bankı (AYİB) Direktorlar Şurasının üzvləri Cənubi Qafqaza səfər edib.
AYİB-in Bakı ofisindən «APA-Economics»ə verilən məlumata görə, Bankın nümayəndələri Ermənistan və Gürcüstana səfər ediblər. Səfər çərçivəsində AYİB-in təmsilçiləri Ermənistan və Gürcüstanın hökumət, diplomatik və biznes qurumlarının üzvləri və vətəndaş cəmiyyətinin nümayəndələri ilə görüşlər keçirib.
AYİB-in Direktorlar Şurası həmçinin hər iki ölkədə Bankın dəstəyi ilə həyata keçirilən layihələrin icrası ilə tanış olub.
Nümayəndə heyətinə Fransadan Alain de Kointet, Avropa İqtisadi Birliyini qurumda təmsil edən Karol Qarnier, Danimarka, İrlandiya, Litva və Makedoniyanı təmsil edən İb Katznelson, İspaniya və Meksikanı təmsil edən Devid Martines Hornillos, Bolqarıstan, Polşa və Albaniyanı təmsil edən Kalin Mitrev, Niderland və Monqolustanı təmsil edən Hans Sprokref, Portuqaliya və Yunanıstanı təmsil edən Joao Kravinho, Ukrayna, Rumıniya, Moldova, Gürcüstan və Ermənistanı təmsil edən İgor Podoliev daxil olub.
Səfər ərzində onları AYİB-in Qafqaz və Belarus üzrə direktoru Maykl Davey müşayiət edib.
Qeyd edək ki, AYİB-in Direktorlar Şurasının təmsilçiləri Cənubi Qafqaza səfər çərçivəsində Azərbaycana gəlməyəcəklər. Belə ki, Bankın nümayəndələri Azərbaycanda 2007-ci ilin oktyabrında olarkən Gürcüstan və Ermənistana səfər etməyiblər.
Qeyd edək ki, AYİB son illər Gürcüstan və Ermənistanda fəaliyyətlərini xeyli genişləndirib və bu ölkələrin milli iqtisadiyyatına müvafiq olaraq 400 mln. və 200 mln. avrodan çox sərmayə yatırıb. Bankın Azərbaycana sərmayələrinin ümumi həcmi isə 1 mlrd. dolları keçib.