Maliyyə

Ana səhifə

Maliyyə

«AccessBank» BMT-nin Qlobal Sazişinə qoşulub

04 dekabr 2008 10:18 (UTC +04:00)

Bakı. Elnur Hüseynquluyev – APA-Economics. Bu gün «AccessBank» Səhmdar Kommersiya Bankı (SKB) BMT-nin Qlobal Sazişinə qoşulub. Bankın baş ofisindən «APA-Economics»ə verilən məlumata görə, BMT-nin Qlobal Sazişinə qoşulmaqla bank insan hüquqları, əmək, ətraf mühitin mühafizəsi və korrupsiya ilə mübarizə sahələrində ümumən qəbul olunmuş 10 prinsipi həyata keçirmək niyyətindədir.
Qeyd edək ki, bu saziş Azərbaycanda BMT-in İnkişaf Proqramı (BMTİP), Avrasiya Tərəfdaşlıq Fondu, eləcə də Azərbaycan İxrac və İnvestisiyaların Təşviqi Fondu (Azpromo) tərəfindən həyata keçirilir.
Xatırladaq ki, «AccsesBank» SKB 2002-ci ilin oktyabr ayından Azərbaycan Mikromaliyyəşəldirmə Bankı kimi fəaliyyət göstərir və 2008-ci ilin sentyabr ayında brendini dəyişib. Bankın təsisçiləri rolunda Avropa Yenidənqurma və İnkişaf Bankı (20%), Beynəlxalq Maliyyə Korporasiyası (20%), Qara Dəniz Ticarət və İnkişaf Bankı (20%), Almaniyanın KfW Bankı (20%), «AccessHolding» (16,53%) və «LFS Financial Systems GmbH.» şirkəti (3,47%) çıxış edir.
Cari ilin oktyabr ayının 1-nə bankın aktivlərinin həcmi 187,532 mln. manat, kredit portfeli 158,718 mln. manat, depozit portfeli 17,208 mln. manat, məcmu kapitalı 39,665 mln. manat, o cümlədən nizamnamə kapitalı 20 mln. manat təşkil edib. Hazırda bankın respublika üzrə 17 filialı, 20 bankomatı və 45 POS-terminalı fəaliyyət göstərir.