Maliyyə

Ana səhifə

Maliyyə

«Bank of Baku» yeni əmanət kampaniyası çərçivəsində bir aya 4 mln. manatdan çox vəsait cəlb edib

04 dekabr 2008 11:39 (UTC +04:00)

Bakı. Elnur Hüseynquluyev – APA-Economics. Azərbaycanın «Bank of Baku» Səhmdar Kommersiya Bankı (SKB) «15 il Boyunca Qazan» uduşlu əmanət kampaniyası çərçivəsində 2008-ci ilin noyabr ayının 5-dən indiyədək 4 mln. manatdan çox vəsait cəlb edib.
Bankın baş ofisindən «APA-Economics»ə verilən məlumata görə, «Bank of Baku»nın 15 illik yubileyinə həsr olunmuş uduşlu əmanət kampaniyası çərçivəsində 15 əmanətçi 15 il boyunca, hər il 100 manat, 5 əmanətçi hər il 1000 manat, bir əmanətçi isə hər il 10 000 manat qazanmaqla, növbəti 15 il ərzində 150 min manat əldə edəcək. Kampaniyanın ümumi uduş fondu 247 500 manat, əmanətlər üzrə faiz dərəcələrinin maksimal həddi isə illik 21% təşkil edir.
Kampaniya 15 həftə müddətində, 2008-ci ilin noyabrın 5-dən 2009-cu ilin fevralın 10-dək davam edəcək. Uduş bankın 15 illiyi (14 fevral 2008-ci il) ərəfəsində teleyayımda canlı efirdə keçiriləcək.
Xatırladaq ki, «Bank of Baku» SKB 1994-cü ilin fevral ayında «Tuqay Bank» adı ilə fəaliyyətə başlayıb. Bankın təsisçiləri rolunda Türkiyənin «NAB Dış Ticarət» şirkəti və bir neçə fiziki şəxs çıxış edir. Cari ilin oktyabr ayının 1-nə bankın aktivlərinin həcmi 185,149 mln. manat, kredit portfeli 153,773 mln. manat, depozit portfeli 145,616 mln. manat, məcmu kapitalı 25,521 mln. manat, o cümlədən nizamnamə kapitalı 6,8 mln. manat təşkil edib. Bankın respublika üzrə 15 filialı, 2 şöbəsi, 23 bankomatı və 226 POS-terminalı fəaliyyət göstərir