Maliyyə

Ana səhifə

Maliyyə

«PricewaterhoouseCoopers» şirkəti «UniBank»ın yarımillik maliyyə hesabatını təsdiqləyib

10 dekabr 2008 13:33 (UTC +04:00)

Bakı. Rəşad Süleymanov – APA-Economics. «PricewaterhoouseCoopers» beynəlxalq auditor şirkəti Azərbaycanın «UniBank» Səhmdar Kommersiya Bankının (SKB) 2008-ci ilin birinci yarısı üzrə maliyyə hesabatının göstəricilərini təsdiq edib. Bu barədə «APA-Economics»ə bankın baş ofisindən məlumat verilib.
Auditin yekunlarına əsasən, «UniBank»ın aktivləri 2008-ci ilin birinci yarısınun sonuna 476,948 mln. manat təşkil edib. Bu göstəricinin yarımillik artımı 23,3%-ə bərabər olub. Qeyd edək ki, bankın daxili statistikasına da əsasən, 2008-ci ilin yanvar-iyun aylarında aktivlərin artımı 23% təşkil edib.
Auditor şirkətinin gəldiyi nəticəyə görə, iyunun 30-u vəziyyətinə «UniBank»ın kredit portfeli yarım ildə 32% artaraq (bankın məlumatında 31% artım göstərilib) 359,888 mln. manata, cəlb edilmiş depozitlərin həcmi isə 29% artaraq (bankın statistikasında 26% artım göstərilib) 159,580 mln. manata çatıb.
«PricewaterhoouseCoopers»in auditi zamanı həmçinin məlum olub ki, «UniBank»ın vergi ödənilənədək balans gəliri yarım ilin yekunlarına görə, 6,203 mln. manat təşkil edib ki, bu da 2007-ci ilin birinci yarısı ilə müqayisədə 11,4 dəfə çoxdur. Vergi ödəniləndən sonrakı gəlir 12,4 dəfə artımla 4,564 mln. manat təşkil edib. Bankın statistikasında isə bu göstəricinin artımı 12 dəfəyə bərabər olub.
Xatırladaq ki, təsisçisi Avropa Yenidənqurma və İnkişaf Bankı (15,15%), Almaniyanın DEG İnvestisiya Korporasiyası (8,33%), hüquqi (0,9%) və fiziki şəxslər (75,62%) olan «UniBank» SKB 1992-ci ildən fəaliyyət göstərir. Cari ilin oktyabr ayının 1-nə bankın aktivlərinin həcmi 467,235 mln. manat, kredit portfeli 347,932 mln. manat, depozit portfeli 111,902 mln. manat, məcmu kapitalı 64,129 mln. manat, o cümlədən nizamnamə kapitalı 15 mln. manat olub. Hazırda bankın respublika üzrə 22 filialı fəaliyyət göstərir.