Maliyyə

Ana səhifə

Maliyyə

Bu il Azərbaycanda daha 20 vergi terminalının quraşdırılması planlaşdırılır

04 fevral 2009 07:45 (UTC +04:00)

Bakı. Aynur Vəliyeva – APA-Economics. Azərbaycan Vergilər Nazirliyi vergi ödəyicilərinə xidmət üzrə kompüter terminallarının fəaliyyətinin təşkili layihəsi çərçivəsində 2009-cu il ərzində respublika ərazisində daha 20 vergi terminalı quraşdırmaq niyyətindədir.
Vergilər Nazirliyindən «APA-Economics»ə verilən məlumata görə, ötən il ərzində ölkə üzrə artıq 15 analoji vergi terminalı quraşdırılıb. Bu terminallar Xırdalan, Xaçmaz, Ağsu, Salyan, Sabirabad, Cəlilabad, Masallı, İmişli, Ağdaş, İsmayıllı, Şəki, Goranboy, Balakən, Qazax rayonlarında və Mingəçevir şəhərində yerləşir.
Qeyd edək ki, bu tədbirlər vergilərin könüllü ödənilməsi sisteminin inkişaf etdirilməsi və vergi ödəyicilərinin hüquqlarının etibarlı qorunmasının təmin edilməsi istiqamətində həyata keçirilir.
İstifadəyə verilmiş kompüter terminallarında fəaliyyətin təşkili və onlardan səmərəli istifadə, eyni zamanda dövlət-sahibkar münasibətlərinin ardıcıl olaraq inkişaf etdirilməsi, sahibkarlığa dövlət köməyi mexanizmlərinin təkmilləşdirilməsi, sahibkarların maarifləndirilməsi, biznes fəaliyyəti subyektlərinə müxtəlif növ (hüquqi, informasiya, metodiki və s.) xidmətlərin göstərilməsi və sahibkarlıq subyektləri təşkilatlarının bu proseslərə cəlb edilməsidir.
Bununla yanaşı, Vergilər Nazirliyi vergi ödəyicilərinə göstərilən xidmətlər sahəsində yeni ideyaların tətbiqini planlaşdırır. Gələcəkdə vergi terminallarının fəaliyyətinin təkmilləşdirilməsi, onların sayının artırılması və yeni terminalların tikintisi, həmçinin bu terminalların vergi ödəyiciləri üçün elektron xidmətlər mərkəzinə çevrilməsi məsələlərinə baxılır.
Hazırda fəaliyyət göstərən kompüter terminallarında fasiləsiz kommunikasiya təchizatı təmin edilib, terminallara ADSL texnologiyası vasitəsi ilə sürətli İnternet xətti çəkilib.
Xatırladaq ki, kompüter terminallarının əsas funksiyaları, xüsusən vergi orqanı olmayan iri şəhər və rayonlarda fəaliyyət göstərən vergi ödəyicilərinə müasir standartlara uyğun vergi xidmətlərinin göstərilməsi, o cümlədən vergi qanunvericiliyinin tətbiqi barədə məlumat və izahatların verilməsi, vergi bəyannamələri ilə bağlı xidmətlərin göstərilməsi, vergi bəyannamələrinin elektron formatda düzgün tərtib edilməsi və göndərilməsi (elektron daşıyıcısında) barədə izahatların verilməsi, vergi ödəyicisi ilə vergi orqanı arasında elektron sənəd mübadiləsinin aparılmasına dair xidmətlər göstərmək, vergi ödəyicilərinin büdcəyə olan borclarının öyrənilməsi, öz şəxsi vərəqəsinə baxış imkanının yaradılması, vergi ödəyiciləri üçün vergi qanunvericiliyinin tətbiqi prosesində qarşıya çıxan cari məsələlər barədə treninqlərin keçirilməsidir.