Maliyyə

Ana səhifə

Maliyyə

Azərbaycan bank sistemi üzrə məcmu kapitalın adekvatlıq əmsalı ötən il dəyişməyib

04 fevral 2009 08:50 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən bankların məcmu kapitalının adekvatlıq əmsalı 2009-cu ilin yanvar ayının 1-nə 19,6% təşkil edib. Azərbaycan Milli Bankından «APA-Economics»ə verilən məlumata əsasən, bu göstərici ötən il ərzində 0,3 faiz bəndi azalıb.
Qeyd edək ki, bu göstərici məcmu kapitalın risklər üzrə çəkili aktivlərin həcminə olan nisbəti şəklində hesablanır. Həmin əmsal bankın dayanaqlığı göstəricisidir ki, o, həmçinin bank kapitalının aparılan aktiv əməliyyatlara uyğunluğunu əks etdirir. Adekvat olan kapitalın həcmi hər hansı neqativ hadisə və amillər baş verdikdə bankın ödəmə qabilliyyətini saxlaması və əməliyyatları davam etdirməsinə imkan yaradır. Adekvat kapitala malik olmayan bank makroiqtisadi və sistemdaxili mənfi hallar baş verdikdə müflisləşmə riskinə daha meylli olur, çünki olun sərəncamındakı kapital ödəmə qabiliyyəti və likvidliyin saxlanmasına imkan vermir. Eyni zamanda, adekvatlıq əmsalı yüksək olan bankın aktiv əməliyyatları kiçik, istifadə edilməyən vəsaitləri böyük olur və ümumilikdə, belə banklarda aşağı gəlirlik müşahidə olunur.
Azərbaycanda məcmu kapitalın adekvatlıq əmsalı yüksək hesab oluna bilər ki, bunun da əsas səbəbi bankların aktiv əməliyyatlara ehtiyatla yanaşması ilə bağlıdır. Qeyd edək ki, ötən il ərzində adekvatlıq əmsalı dəyişkənlik nümayiş etdirib. Belə ki, ötən ilin sonuncu rübündə bu göstərici 1,9 faiz bəndi artıb və bu, banklar tərəfindən kreditləşmənin məhdudlaşdırılması ilə bağlıdır.