Maliyyə

Ana səhifə

Maliyyə

ABŞ dollarının Azərbaycan valyuta bazarında payı azalır

04 fevral 2009 10:52 (UTC +04:00)

Bakı. Vüqar İsrafilov – APA-Economics. Azərbaycanın daxili valyuta bazarının ümumi həcmi 2008-ci ildə 26 mlrd. 567 mln. 38,9 min manat təşkil edib. Bu barədə «APA-Economics»ə Azərbaycan Milli Bankından məlumat verilib.
AMB-dən bildirilib ki, ötən il valyuta bazarının həcmi 75,49% və yaxud 11,428 mlrd. manat artıb. Əvvəlki ilin artım tempi ilə müqayisədə maliyyə bazarının ən önəmli hissəsi olan xarici valyutalarla əməliyyatların illik dinamikası demək olar ki, iki dəfə yüksəlib. Hesabat ilinin rekord aylıq artım templəri isə (25,3%) dekabr və oktyabr aylarında qeydə alınıb. Ötən ilin son ayında valyuta bazarının həcmi manat ekvivalentində 3,368 mlrd-dan çox olub, oktyabrda isə bu göstərici 3,348 mlrd. manat təşkil edib:

Maraqlıdır ki, valyuta bazarında ABŞ dolları ilə aparılan əməliyyatların xüsusi çəkisi 69,85% təşkil edib, halbuki 2007-ci ildə bunun payı 80%-dən çox olub.
Dedollarizasiya tendensiyası ABŞ dolları ilə aparılan konvertasiya əməliyyatlarının tempində də əks olunur. Daxili valyuta bazarında dollar seqmentinin artım tempi 53,21% təşkil etdiyi halda, bu, ümumi artım dinamikasından 1,42 dəfə azdır.
Qeyd etmək lazımdır ki, avro, funt sterlinq və Rusiya rublu seqmentlərindən fərqli olaraq, dollar bazarının əsasını bankdaxili əməliyyatlarla bərabər valyuta birjası (BBVB) və açıq banklararası bazar təşkil edir. BBVB-nin valyuta bölməsində 2008-ci ildə 2,02 mlrd. manata yaxın həcm qeydə alınıb, açıq banklararası valyuta bazarında isə dollarla əməliyyatlar manat ekvivalentində 3,06 mlrd-a çatıb. Maraqlıdır ki, bankların birjadakı əməliyyatları 501 mln. manat artdığı halda, açıq bazarda bu artım 1,311 mlrd. manat təşkil edib. Nəticədə, ötən il birjanın banklararası dollar bazarında payı 46,48%-dən 39,80%-ə enib.