Maliyyə

Ana səhifə

Maliyyə

Azərbaycanda milli valyutada olan bank kreditləri üzrə orta faiz dərəcəsi illik 17,45%-ə yüksəlib

05 fevral 2009 11:30 (UTC +04:00)

Bakı. Vüqar İsrafilov – APA-Economics. Azərbaycanda fəaliyyət göstərən bankların milli valyuta ilə ayırdığı kreditlər üzrə orta faiz dərəcələri 2008-ci il ərzində 0,48 faiz bəndi artaraq illik 17,45%-ə çatıb.
Azərbaycan Milli Bankından «APA-Economics»ə verilən məlumata görə, manatla hüquqi şəxslərə verilən kreditlər üzrə orta faiz dərəcəsi 0,26 faiz bəndi azalaraq illik 14,87%-ə düşüb, fiziki şəxslər üzrə isə 1,24 faiz bəndi artaraq 21,53%-ə yüksəlib.
Eyni zamanda, xarici valyutada verilən kreditlər üzrə bankların orta faiz dərəcələri 1,74 faiz bəndi azalaraq illik 14,52% olub. Bu dövrdə hüquqi şəxslərə xarici valyutada verilən kreditlər üzrə orta faiz dərəcəsi ilin əvvəlindəki 13,72%-dən hesabat dövrünün sonuna 12,37%-ə düşüb. Son bir il ərzində fiziki şəxslərə xarici valyutada verilən kreditlər üzrə faiz dərəcəsi isə illik 21,70%-dən 21,52%-ə enib.
Qeyd edək ki, 2008-ci ildə kredit və depozitlər üzrə faiz dərəcələri arasında əhəmiyyətli dəyişiklik baş verməyib. Belə ki, manatla kreditlərlə depozitlər arasındakı fərq ötən ilin əvvəlində 5,61% təşkil edirdisə, bu ilin əvvəlinə həmin göstərici 5,84%-dək artıb, xarici valyutada kreditlərlə depozitlər arasındakı fərq isə 4,04%-dən 6,56%-ə yüksəlib.
Xatırladaq ki, 2007-ci ilin dekabr ayında milli valyuta ilə kreditlər üzrə orta faiz dərəcələri 2006-cı ilin müvafiq ayına nisbətən cəmi 0,47 faiz bəndi artaraq illik 16,97% təşkil edib. Manatla hüquqi şəxslər üzrə orta faiz dərəcələri həmin dövrdə 0,24 faiz bəndi artaraq illik 15,13%-ə, fiziki şəxslər üzrə 0,19 faiz bəndi qalxaraq illik 20,29%-ə çatıb. Xarici valyutada verilən kreditlər üzrə orta faiz dərəcələri 2006-cı ilin dekabrına nisbətən 0,91 faiz bəndi azalaraq illik 16,26% olub. Bu dövrdə hüquqi şəxslərə xarici valyutada verilən kreditlər üzrə orta faiz dərəcəsi 2006-cı ilin dekabrındakı 14,81%-dən 2007-ci ilin sonuna illik 13,72%-ə enib, fiziki şəxslərə verilən kreditlər üzrə faiz dərəcəsi isə 21,82%-dən 21,70%-ə düşüb. Belə ki, manatla kreditlərlə depozitlər arasındakı fərq 2007-ci ildə 6,11%-dən 5,61%-ə qalxıb, xarici valyutada kreditlərlə depozitlər arasındakı fərq isə əksinə, 5,59%-dən 4,04%-ə enib.