Maliyyə

Ana səhifə

Maliyyə

Azərbaycanda fiziki şəxslərə ayrılan bank kreditlərinin həcminin artım tempi ötən il kəskin azalıb

06 fevral 2009 09:32 (UTC +04:00)

Bakı. Vüqar İsrafilov – APA-Economics. Azərbaycanda ev təsərrüfatlarının banklardan cəlb etdiyi kreditlərin artım tempi 2008-ci ildə 2,5 dəfə azalaraq 40,9% təşkil edib. Bu barədə «APA-Economics»ə Azərbaycan Milli Bankının (AMB) Statistika və Tədqiqatlar Departamentindən məlumat verilib.
AMB-nin hesabatına əsasən, ölkədəki bankların fiziki şəxslərə ayırdığı kredit vəsaitləri 2008-ci ildə 2 334,9 mln. manata çatıb. Bu göstərici son bir ildə 729 mln. manat artsa da, 2007-ci ilin müvafiq faktiki artım həcmindən 13,3% az olub. Eyni zamanda, artım tempinin azalması nəticəsində bu növ kreditlərin bankların ümumi kredit portfelində payı 35,5%-dən 33,4%-ə enib. Maraqlıdır ki, fiziki şəxslərə verilən kreditlərin yalnız 1,3%-i plastik kartlarla əməliyyatların payına düşür.
AMB-dən həmçinin bildirilib ki, təhlil olunan dövr ərzində qeyri-maliyyə müəssisələri olan hüquqi şəxslərə bankların kredit qoyuluşları əvvəlki ilin müvafiq dövrünə nisbətən 59,5% artıb. Onun məcmu kredit qoyuluşlarında xüsusi çəkisi isə son bir ildə 54,8%-dən 66,6%-dək yüksəlib. Ötən il sənaye və istehsala yönəldilən kreditlərin həcmi 38,8% artaraq 427,5 mln. manata, ticarət və xidmət sahələrinə - 60,1% artaraq 1 911,3 mln. manata, kənd təsərrüfatı və emala - 32,6% artaraq 261,5 mln. manata, nəqliyyat və rabitə sektorlarına verilən kreditlərin həcmi isə 42,5% artaraq 669,1 mln. manata çatıb.
Qeyd edək ki, iqtisadiyyatın digər sahələrinin inkişafına təkan verə biləcək inşaat və əmlak sektoruna yönəldilən bank kreditlərinin həcmi ötən il ərzində 47,7% artaraq 2009-cu ilin əvvəlinə 461,4 mln. manat təşkil edib.
Cari ilin əvvəlinə kredit qoyuluşlarının iqtisadiyyatın sahələri üzrə strukturu aşağıdakı kimi olub:

Kreditlərin həcmi, mln. AZN	Ümumi məbləğdə xüsusi çəki, %-lə		01.01.2008 tarixinə nisbətən dəyişmə, %-lə
Qeyri-maliyyə müəssisələri olan hüquqi şəxslər	4 663,9	66,6	64,5
Ticarət və xidmət	1 911,3	27,3	60,1
Energetika və təbii ehtiyatlar	855,7	12,2	3 dəfə
Kənd təsərrüfatı və emal	261,5	3,7	32,6
İnşaat və əmlak	461,4	6,6	47,7
Sənaye və istehsal	427,5	6,1	38,7
Nəqliyyat və rabitə	669,1	9,6	42,5
Dövlət idarəetməsi	0,6	0,01	0,9
Digər kredit əməliyyatları	76,9	1,1	0,9
Fiziki şəxslər	2 334,9	33,4	40,9
C Ə M İ	6 998,8	100	52,8