Maliyyə

Ana səhifə

Maliyyə

Qazaxıstan və Tacikistanın Milli bankları milli valyutalarının devalvasiyasına başlayıb

07 fevral 2009 10:22 (UTC +04:00)

Bakı. Vüqar İsrafilov - APA-Economics. Qlobal maliyyə böhranından əziyyət çəkən Qazaxıstan və Tacikistanın Milli bankları milli valyutalarının devalvasiyasına başlayıb.
Qazaxıstan Fond Birjasının (KASE) «APA-Economics»ə verilən məlumata görə, tenqenin ABŞ dollarına qarşı məzənnəsi 25% enib və yaxın gələcəkdə hər USD-a görə 150 KzT-dən çox təşkil etməyəcək. Bu addım ölkənin qeyri-neft ixrac potensialının artırılması və milli istehsalçılarının rəqabətliyinə yardım göstərilməsi məqsədi ilə atılır.

KASE-nin dünən axşam keçirdiyi ticarət sessiyasında tenqenin məzənnəsi hər dollara görə 149,25-ə çatıb. Eyni zamanda, cari ilə büdcə proqnozlarında nəzərdə tutulmuş tenqenin məzənnəsi 123,5 KzT/$1 təşkil edib. Beynəlxalq Valyuta Fondu ekspertlərinin fikrincə, Qazaxıstandakı maliyyə böhranın başlıca səbəbləri ölkə bank sektorunun xarici bank dairələrindən kəskin asılılığı və əsas ixrac məhsulu olan xam neftə qiymətlərin düşməsidir.

Qazaxıstandan fərqli olaraq, Tacikistan Milli Bankı devalvasiyanı mərhələli və tədricən keçirməyə başlayıb. Ötən həftə ərzində Tacikistan somu dollara qarşı 4% ucuzlaşıb, son bir ayda isə devalvasiya 10% təşkil edib. Nəticədə rəsmi məzənnə hər USD görə 3,82 soma, bankların valyutadəyişmə məntəqələrində isə 4 soma çatıb. Bu tendensiya ölkə valyuta ehtiyatlarının iki dəfə azalması (200 mln. ABŞ dollarından az) və daxili valyuta bazarında yaranan dollar qıtlığı şəraitində baş verir. Məzənnənin əvvəlki səviyyədə saxlanılması üçün Tacikistan Milli Bankına daxili valyuta bazarında həyata keçirdiyi intervensiyalar üçün ayda ən azı 50 mln. dollar lazımdır.

Xatırladaq ki, qlobal maliyyə böhranı nəticəsində MDB ölkələrində ilk olaraq milli valyutalarının devalvasiyasına Rusiya və Belorus başlayıb. Son bir ayda bu ölkələrdə devalvasiya müvafiq olaraq 24% və 20% təşkil edib.