Maliyyə

Ana səhifə

Maliyyə

Azərbaycanda fiziki şəxslərin bank əmanətlərinin 8,5%-i regionların payına düşür

09 fevral 2009 12:45 (UTC +04:00)

Bakı. Vüqar İsrafilov – APA-Economics. Son bir ildə Azərbaycanın regionlarında bankların fiziki şəxslərdən qəbul etdiyi depozitlərin respublika üzrə məcmu depozit portfelində xüsusi çəkisi 6,5%-dən 8,5% qədər artıb. Bu barədə «APA-Economics»ə Azərbaycan Milli Bankının (AMB) statistika və tədqiqatlar şöbəsindən məlumat verilib.
Rəsmi bank statistikasına görə, kredit qurumlarının regionlar üzrə şəbəkəsinin artması ev təsərrüfatlarının bank xidmətlərinə çıxışını asanlaşdırıb. Ölkə üzrə əhalidən cəlb olunan əmanətlərin strukturunda Bakı şəhərinin payına 91,5% düşür, digər şəhər və rayonların payı isə ayrı-ayrılıqda heç 2%-ə çatmır.
Maraqlıdır ki, Bakı şəhəri üzrə qəbul edilən əmanətlərin 21,6%-i tələb olunanadək, 78,4%-i isə müddətli əmanətlərin payına düşür. Regionlarda isə tələb olunanadək əmanətlərin xüsusi çəkisi 62,4%, müddətli əmanətlərin xüsusi çəkisi 37,6% təşkil edir.

Əmanətlərin regional strukturu (01.01.2009)
Bakı	91,5%
Sumqayıt	1,6%
Gəncə	1,1%
Lənkəran	0,5%
Naxçıvan	0,3%
Digər	5,0%

Xatırladaq ki, ev təsərrüfatlarının banklarda açdıqları depozit və əmanətlərin məcmu həcmi 2008-ci ilin sonuna 1 903,7 mln. manat təşkil edib. Bu məbləğ ötən il ərzində 435,4 mln. manat və yaxud 29,7% azalıb.