Maliyyə

Ana səhifə

Maliyyə

Azərbaycanda bank depozitlərinin 60%-i xarici valyutada yerləşdirilib

09 fevral 2009 14:11 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən banklar tərəfindən 2009-cu ilin yanvar ayının 1-dək cəlb olunmuş əmanət və depozitlərin 41,5%-i manatla, 58,5%-i isə xarici valyutada ifadə olunub.
Azərbaycan Milli Bankından «APA-Economics»ə verilən məlumata əsasən, ümumilikdə 2008-ci il ərzində əmanət və depozitlərin həcmi 32,1% və ya 1 094,6 mln. manat artaraq yanvarın 1-nə 4 505,7 mln. manata çatıb.
İlin yekununda manatla tələb olunanadək əmanət və depozitlər əvvəlki illə müqayisədə 6%, müddətli əmanət və depozitlər isə 20,6% artıb. Hüquqi şəxslərin depozitlərinin manatla cəmi əmanət və depozitlərdə xüsusi çəkisi ötən ildəki 59,3%-dən 44,6%-ə düşüb. Fiziki şəxslərin manatla uzunmüddətli əmanətlərinin illik artımı 76,7% təşkil edib.
Hesabat ili ərzində xarici valyutada olan əmanət və depozitlərin artım tempi 50,8%, milli valyutada - 12,5% olub. Fiziki şəxslərin manatla əmanətlərinin artım tempi xarici valyuta ilə əmanətlərinin artım tempini üstələyib. Belə ki, son bir ildə əhalinin manatla əmanətləri 53,1%, xarici valyutada əmanətləri 9,6% artıb.
Fiziki şəxslərin əmanətlərinin strukturunda xarici valyutada olan əmanətlərin xüsusi çəkisi son bir ildə 53,9%-dən 45,6%-ə düşüb.