Maliyyə

Ana səhifə

Maliyyə

«Bank Standard» ötən il nizamnamə kapitalını 30% artırıb

10 fevral 2009 07:04 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» Səhmdar Kommersiya Bankının (SKB) aktivlərinin həcmi 2009-cu ilin yanvar ayının 1-nə 619,085 mln. manat təşkil edib ki, bu da ötən ilin yanvarın 1-nə olan analoji göstəricidən 1,7% çoxdur.
Bankın baş ofisindən «APA-Economics»ə verilən məlumata görə, hesabat ilində bankın kredit portfeli 3% azalaraq 394,421 mln. manat, depozit portfeli isə 25,7% azalaraq 191,812 mln. manat olub. Həmçinin, bu müddət ərzində bankın məcmu kapitalı 6,3% artaraq 77,356 mln. manat, o cümlədən nizamnamə kapitalı 29% artaraq 64,6 mln. manat təşkil edib.
Qeyd edək ki, ötən il bankın gəlirləri 51,7% artaraq 98,481 mln. manata, xərcləri isə 42% artaraq 67,448 mln. manata çatıb. Nəticədə, bankın mənfəəti 78% artaraq 31,033 mln. manat təşkil edib.
Bu müddət ərzində bank tərəfindən əlavə 5 filial açılıb, həmçinin 11 bankomat və 215 POS-terminal quraşdırılıb. Cari ilin yanvar ayının 1-nə bankın işçilərinin sayı 429 nəfər olub.
Xatırladaq ki, «AB Standard» Şirkətlər Qrupuna daxil olan «Bank Standard» SKB 1995-ci ildən fəaliyyət göstərir. Hazırda bankın respublika üzrə 16 filialı, 49 bankomatı və 429 POS-terminalı mövcuddur.