Maliyyə

Ana səhifə

Maliyyə

Azərbaycanda ticarət, nəqliyyat, rabitə və xidmət müəssisələrinin bank kassa dövriyyəsində payı hələ də aşağı həddədir

11 fevral 2009 09:33 (UTC +04:00)

Bakı. Vahab Rzayev – APA-Economics. Ötən il ərzində Azərbaycanda bank kassa mədaxilində ticarət, nəqliyyat, rabitə və xidmət müəssisələrinin məcmu daxilolmalarının həcmi 1 101 859 600 manat təşkil edib ki, bu da ümumi kassa mədaxilinin (19 567 781 500 manat) 5,63%-nə bərabərdir.
Azərbaycan Milli Bankından (AMB) «APA-Economics»ə verilən məlumata əsasən, bu məbləğin əsas hissəsi, yəni 711,2 mln. manatı və ya 64,5%-i ticarət müəssisələrinin payına düşür:

Bu kateqoriya aid olan müəssisə və sahibkarlardan banklara mədaxil ötən il ərzində 23,2% artıb. O cümlədən, ticarət sahəsindən bank kassa mədaxili 2007-ci illə müqayisədə 35,3%, rabitə sahəsindən 20,7%, məişət xidməti sahəsindən 36,5% artıb, nəqliyyat sahəsindən isə mədaxil 8% azalıb.
Həmin artım göstəricilərinə baxmayaraq, vurğulamaq lazımdır ki, bu sahələrin bank kassa mədaxili hələ də kiçik həcmdədir. Bunu nisbi təhlil də aydın göstərir. Belə ki, ötən il yalnız ölkədaxili ticarət dövriyyəsi və göstərilmiş pullu xidmətlərin həcmi 14,3 mlrd. manat, nəqliyyat sahəsində xidmətlərin pul ifadəsi 1,9 mlrd. manat, rabitə sahəsinin məcmu xidmətlərinin dəyəri 926 mln. manat təşkil edib. Bu göstəriciləri həmin sahələrdən bank kassa dövriyyəsində mədaxili ilə müqayisə etsək, əldə edilmiş real gəlirlərin və göstərilmiş xidmətlərin dəyərinin kəskin üstələnməsini aşkar görərik. Bunun əsasında həmin sahələrin nağd, bank dövriyyəsindən kənarda qalan hissəsinin miqyasını dərk etmək çətin olmaz.