Maliyyə

Ana səhifə

Maliyyə

«Royal Bank» yaxın vaxtlarda yeni regional filial açacaq

11 fevral 2009 13:20 (UTC +04:00)

Bakı. Elnur Hüseynquluyev – APA-Economics. «Royal Bank» Açıq Səhmdar Cəmiyyəti (ASC) yaxın vaxtlarda Qaradağ rayonunun Sahil qəsəbəsində filial açmaq niyyətindədir. Bankın Bakıdakı baş ofisindən «APA-Economics»ə verilən məlumata görə, artıq bununla bağlı yeni filialın təsis sənədləri hazırlanır.
Bankdan bildirilib ki, strateji plana uyğun olaraq, bu il ərzində 4 filialın açılması nəzərdə tutulub. Filiallar əsasən respublikanın regionlarını əhatə edəcək ki, bunların konkret ünvanı bankın İdarə Heyətinin yaxın vaxtlarda keçiriləcək növbəti iclasında dəqiqləşəcək.
Qeyd edək ki, hazırda bankın respublika üzrə 28 filialı fəaliyyət göstərir və bunun yarıdan çoxu regionlarda yerləşir.
Xatırladaq ki, təsisçisi ABŞ vətəndaşı olan «Royal Bank» SKB 1993-cü ildə Azərbaycanda «OZ Bank» kimi yaradılıb. Cari ilin yanvar ayının 1-nə bankın aktivlərinin həcmi 101,926 mln. manat, kredit portfeli 78,764 mln. manat, depozit portfeli 36,085 mln. manat, məcmu kapitalı 17,853 mln. manat, o cümlədən nizamnamə kapitalı 16,912 mln. manat təşkil edib. Hazırda bankın 3 mübadilə məntəqəsi, 27 bankomatı və 76 POS-terminalı var.