Maliyyə

Maliyyə

«United Credit Bank» son bir ildə kredit portfelini 23% artırıb

13 fevral 2009 09:49 (UTC +04:00)

Bakı. Elnur Hüseynquluyev – APA-Economics. Azərbaycanın «United Credit Bank» Açıq Səhmdar Cəmiyyətinin (ASC) aktivlərinin həcmi 2009-cu ilin fevral ayının 1-nə 32,393 mln. manat təşkil edib ki, bu da ötən ilin müvafiq dövrünün analoji göstəricisi ilə müqayisədə 12,2% çoxdur.
Bankın İdarə Heyətinin sədr müavini Vahid Əliyevin «APA-Economics»ə verdiyi məlumata görə, hesabat dövründə bankın kredit portfeli 23,1% artaraq 22,777 mln. manata, müddətli depozitlərin həcmi isə 2,2% artaraq 6,247 mln. manata çatıb. Həmçinin, bankın fiziki şəxslərin müddətli depozitlərinin həcmi 3,3% genişlənərək 5,331 mln. manat, məcmu kapitalı 13,376 mln. manat, o cümlədən nizamnamə kapitalı 12,108 mln. manat təşkil edib.
Bu ilin fevral ayının 1-nə bankın istehlak kreditlərinin həcmi 8,911 mln. manat, kommersiya banklarına verilən kreditlər 250 min manat, məcmu depozit portfeli 8,433 mln. manat, sığorta şirkətlərinin müddətli depozitləri isə 916 min manat olub. Eyni zamanda, tələb olanunadək depozitlər 2,186 mln. manat, o cümlədən hüquqi şəxslər üzrə 173,31 min manat, fiziki şəxslər üzrə 1,943 mln. manat təşkil edib.
Qeyd edək ki, bu müddət ərzində bankın ümumi gəlirləri 22% artaraq 458 min manata, o cümlədən faiz gəlirləri 19% artaraq 402 min manata, qeyri-faiz gəlirləri isə 47,4% artaraq 56 min manata çatıb. Bakın ümumi xərcləri 583 min manat, faiz xərcləri 149 min manat və qeyri-faiz xərcləri isə 434 min manat olub.
Xatırladaq ki, təsisçisi 1 hüquqi və 2 fiziki şəxs olan «United Credit Bank» 1996-cı ildə «Rossiyskiy Kredit» Rusiya-Azərbaycan Kommersiya Bankı kimi yaradılıb və 1998-ci ildə brendini dəyişib. Hazırda bankın respublika üzrə 5 filialı və 5 bankomatı fəaliyyət göstərir.