Maliyyə

Maliyyə

G-7 ölkələrinin maliyyə nazirləri birgə kommünike imzalayıb

16 fevral 2009 14:18 (UTC +04:00)

Bakı. Vahab Rzayev – APA-Economics. Ötən həftənin sonunda Romada keçirilən G-7 ölkələrinin maliyyə nazirləri toplantısının yekununda Birgə Kommünike imzalanıb. «APA-Economics»in məlumatına görə, G-7 ölkələri dünya iqtisadi geriləmə ilə mübarizə və maliyyə bazarlarının sabitləşməsini özləri üçün prioritet məqsəd kimi qəbul edib.
Kommünikedə iqtisadiyyatların və məşğulluğun artımını təmin etmək və maliyyə sektorunu gücləndirmək məqsədi ilə bütün imkanlardan, o cümlədən siyasi alətlərdən istifadə etməklə birgə əməkdaşlığın aparılması niyyəti vurğulanır. Eyni zamanda, natarazlıqların və disproporsiyaların yaranmaması üçün ölkələrin maliyyə rəhbərliklərinin birgə fəaliyyətinin davam etdirilməsi vacibliyi xüsusən qeyd olunur.
Sammitin əsas mövzularından biri böhran şəraitində dövlət nəzarəti və proteksionizm kimi məsələlər müzakirə olunaraq vurğulanıb ki, iqtisadiyyatda proteksionizm, o cümlədən xarici ticarətdəki məhdudiyyətlər iqtisadi geriləməni yalnız kəskinləşdirə bilər. Həmçinin bildirilir ki, böhran şəraitində ölkələrin vergi siyasəti tarazlı proporsiyalarda vergi güzəştləri və büdcə tədbirlərini cəmləşdirməlidir ki, bunların hamısı daxili tələbatın artımı, iş yerlərinin açılması və dövlətlərin sosial proqramlarını icra etməyə imkan verməlidir.
Qeyd edək ki, kommünikenin imzalanması və onun tərkibində əməkdaşlıq prinsiplərinin əks olunması müsbət haldır. Lakin əmin olmaq lazımdır ki, nəzərdə tutulan əməkdaşlıq yalnız kağız üzərində qalmayacaq, çünki böhran şəraitində hər ölkə öz daxili bazarı və iqtisadiyyatı qorumağa daha çox düşünəcək və əgər bu proses digər ölkələrin maraqlarına zidd olarsa, buna heç bir əhəmiyyət verməyəcək. Demək olar ki, sammit heç bir konkret tədbirlər planının qəbul edilməsi ilə yadda qalmayıb - sadəcə bəyanat xarakterli sənəd qəbul olunub.