Maliyyə

Maliyyə

Azərbaycan bazarına hədsiz gəlirliklə yeni bank depoziti təqdim olunub

17 fevral 2009 06:50 (UTC +04:00)

Bakı. Elnur Hüseynquluyev – APA-Economics. Azərbaycanın «Rabitəbank» Səhmdar Kommersiya Bankı (SKB) «Dost əmanəti» adlı yeni depozit kampaniyasına start verib.
Bankın baş ofisindən «APA-Economics»ə verilən məlumata görə, «Dost əmanəti» üzrə faiz artımı əlavə cəlb olunan və ya əmanətçinin özü tərəfindən artırılan məbləğdən asılıdır. Şərtlərə görə, əmanətçi «Dost əmanətində» 1000 manat məbləğində illik 14% dərəcəsi ilə vəsait yerləşdirir. Əgər əmanətçinin dostlarından biri və ya özü «Rabitəbank»da 5000 manat əlavə vəsait yerləşdirərsə, əmanət cəlb edən (1000 manat olan) əmanətçinin faiz dərəcəsi 5 faiz bəndi artır (5000 manat bölünür 1000 manata) və illik 19%-ə (14% + 5%) çatır.
Əgər əmanətçi tərəfindən cəlb olunan məbləğ 50 min manat olarsa, əlavə vəsait cəlb edən əmanətçinin depoziti üzrə gəlirlik 50 faiz bəndi artır (50 000 manat bölünür 1 000 manata) və faiz dərəcəsi illik 64%-ə çatır.
Maraqlıdır ki, əmanətçi tərəfindən cəlb olunan məbləğ 500 min manat olarsa, əsas əmanətçinin illik giliri 500 faiz bəndi artaraq (500 000 manat bölünür 1 000 manata) illik 514%-ə çatır.
Qeyd edək ki, «Dost əmanəti» üzrə minimal məbləğ 200 manat (dollar) təşkil edir. Əmanəti 1 və ya 2 il müddətinə yerləşdirmək olar, hesablanan faizlər hər rüb ödənilir. İlkin faiz dərəcəsi 14% təşkil edir, maksimal gəlirlik isə hədsizdir.
Xatırladaq ki, «Rabitəbank» SKB 1993-cü ildən fəaliyyət göstərir. Cari ilin yanvar ayının 1-nə bankın aktivlərinin həcmi 94,425 mln. manat, kredit portfeli 68,434 mln. manat, depozit portfeli 76,958 mln. manat, məcmu kapitalı 12,326 mln. manat, o cümlədən nizamnamə kapitalı 8,5 mln. manat təşkil edib.
Bankın hazırda respublika üzrə 18 filialı, 4 mübadilə məntəqəsi, 21 bankomatı və 84 POS-terminalı fəaliyyət göstərir.