Maliyyə

Maliyyə

Azərbaycanın ən iri bankı son bir ildə mövqelərini daha da möhkəmləndirib

17 fevral 2009 12:57 (UTC +04:00)

Bakı. Vüqar İsrafilov – APA-Economics. Azərbaycan Beynəlxalq Bankının (ABB) ölkənin bank sistemi üzrə məcmu aktivlərdə xüsusi çəkisi 2008-ci ildə 3,86 faiz bəndi artaraq 42,53%-ə çatıb. Nəticədə, Beynəlxalq Bankın aktivlərinin həcmi 2009-cu ilin əvvəlinə 4,370 mlrd. manat təşkil edib. Bu barədə «APA-Economics»ə ABB-dən məlumat verilib.
Ötən il ərzində ABB-nin aktivlərinin artımı 68,05% təşkil edib, halbuki 2007-ci ildə bu göstərici 46%-ə bərabər olub. Mütləq rəqəmlərdə isə aktivlərin artım göstəricisi 2,2 dəfə yüksəlib – 810 mln. manatdan 1 769,8 mln. manatadək. Ölkənin ən iri kredit təşkilatı statusunu təsdiqləyən Beynəlxalq Bank son bir ildə aktivlərin dinamikasına görə bank sektorunun məcmu göstəricilərini də üstələyib. Ölkə üzrə ümumilikdə 52,75% çoxalan bank aktivlərinin xalis artımı 3 547,8 mln. təşkil etsə də, bu məbləğin yarısı məhz ABB-nin hesabına formalaşıb.
Maraqlıdır ki, ABB-nin aktivlərinin 70%-i və ya 3,058 mlrd. manatı bankın kredit portfelinin payına düşür. ABB tərəfindən ayrılan kreditlərin ümumi həcmi ölkə üzrə ÜDM-in 9,02%-nə bərabərdir (2007-ci ildə bu göstərici 7,5%, 2006-cı ildə isə 5,6% olub). Son bir ildə bankın kredit portfelinin həcmi 62% və yaxud 1,3 mlrd. manat artaraq, bank sistemi üzrə kreditlərin həcmindəki payı 43%-ə çatıb.
Ənənəvi olaraq kredit fəallığı ilə seçilən ABB qeyri-rezidentlər qarşısında öhdəliklərini 1 014,4 mln. manatadək azaldıb və paralel olaraq müştərilərdən cəlb etdiyi depozitləri və kapitallaşdırmanı da artırıb. Belə ki, 2008-ci ildə bankın kapitalı 70% artırılıb və ilk dəfə olaraq 418,6 mln. manat (təxminən 519 mln. ABŞ dolları) təşkil edib. Bundan başqa, hesabat dövründə ABB öhdəliklərini ilk dəfə olaraq rekord həddə - 3 848,8 mln. manata çatdırıb, əhalidən cəlb olunan depozitlərin həcmi isə il ərzində 33% artaraq 497 mln. manat təşkil edib.
Xatırladaq ki, Azərbaycan Beynəlxalq Bankı 1992-ci ildə yaradılıb, dövlətin bankdakı iştirak payı isə 50,2%-ə bərabərdir. Qalan 10% bankın əməkdaşları, 40% isə özəl şəxslərə məxsusdur.