Maliyyə

Maliyyə

«Azərdəmiryolbank»la IFC arasında yeni kredit müqaviləsi bağlanıb

18 fevral 2009 10:33 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) ilə Beynəlxalq Maliyyə Korporasiyası (IFC) arasında kredit müqaviləsi imzalanıb.
Bankın baş ofisindən «APA-Economics»ə verilən məlumata görə, IFC-nin «Qlobal ticarətin maliyyələşdirilməsi Proqramı» çərçivəsində Azərbaycan bankı beynəlxalq qurumdan 5 mln. ABŞ dolları həcmində kredit cəlb edib.
Bankın İdarə Heyətinin sədr müavini Yusif Cabbarovun sözlərinə görə, bu müqavilə sənədli əməliyyatların inkişafında və digər beynəlxalq təşkilatlarla bu sahədə əməkdaşlığın möhkəmləndirilməsində böyük rol oynayacaq. Razılaşmanın şərtlərinə görə, maliyyələşdiriləcək əməliyyatların həcminə heç bir məhdudiyyət qoyulmayıb, ticarət əməliyyatları isə istənilən ölkədə aparıla bilər.
Qeyd edək ki, bankın IFC ilə əməkdaşlığı 1998-ci ildə kiçik və orta sahibkarlığın maliyyələşdirilməsi layihəsi ilə başlayıb. Hazırda tərəflər arasında əməkdaşlıq bir neçə istiqamətdə aparılır. Belə ki, ötən ilin avqust ayında bağlanmış, ümumi məbləği 5 mln. dollarlıq müqavilə «Azərdəmiryolbank»ın əhaliyə ipoteka kreditlərinin verilməsi üçün nəzərdə tutulub. Bundan başqa, 2009-cu ilin I rübünün sonunadək bankla IFC arasında daha bir müqavilənin imzalanması gözlənilir. Bu müqaviləyə görə, bank mikrokreditlərin verilməsi məqsədilə IFC-dən növbəti 5 mln. dollarlıq kredit xətti cəlb edəcək.
Xatırladaq ki, 1989-cu ildə təsis olunan «Azərdəmiryolbank SKB-nin 850-yə yaxın səhmdarı var, nizamnamə kapitalında «25%+1 səhm» zərfi Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Şirkətinə (FMO), 10% hüquqi şəxslərə, qalanı isə fiziki şəxslərə məxsusdur.
Hazırda bankın 27 filialı fəaliyyət göstərir. Cari ilin yanvar ayının 1-nə bankın aktivlərinin həcmi 224,698 mln. manat, kredit portfeli 168,592 mln. manat, depozit portfeli 49,497 mln. manat, məcmu kapitalı 37,398 mln. manat, o cümlədən nizamnamə kapitalı 13,40 mln. manat təşkil edib.