Maliyyə

Maliyyə

Yanvarda Azərbaycanda inflyasiya 11,9% olub

19 fevral 2009 07:56 (UTC +04:00)

Bakı. Nicat Mustafayev – APA-Economics. Bu ilin yanvar ayında Azərbaycanda istehlak mallarının qiymətləri və xidmət tarifləri 2008-ci ilin dekabr ayı ilə müqayisədə 0,6%, o cümlədən ərzaq məhsullarının qiymətləri 1%, qeyri-ərzaq mallarının qiymətləri isə 0,3% ucuzlaşıb.
Dövlət Statistika Komitəsindən «APA-Economics»ə verilən məlumata görə, yanvarda xidmət tarifləri 2008-ci ilin dekabr ayının səviyyəsində qalıb.
Hesabat ayında 2008-ci ilin yanvarına nisbətən istehlak mallarının qiymətləri və xidmət tarifləri 11,9%, o cümlədən ərzaq məhsullarının qiymətləri 14,5%, qeyri-ərzaq mallarının qiymətləri 8,9%, xidmət tarifləri isə 7,7% bahalaşıb. Yanvar ayında ərzaq məhsullarından kərə yağı, ət, pendir, yumurta, buğda çörəyi, kartof, soğan, kələm, xiyar, pomidor, almanın qiyməti düşüb.
Qeyri-ərzaq mallarından isə geyim, ayaqqabı, taxta-şalban, sement, tikinti kərpici, mebelin qiyməti ucuzlaşıb.

İstehlak mallarının qiymətləri və xidmət tarifləri

	2009-cu ilin yanvar ayı 2008-ci ilin dekabr ayına nisbətən	2009-cu ilin yanvar ayı 2008-ci ilin yanvar ayına nisbətən
Cəmi mal və xidmətlər üzrə	99,4	111,9
Ərzaq məhsulları, içkilər, tütün	99,0	114,5
Qeyri-ərzaq malları	99,7	108,9
Xidmətlər	100,0	107,7

Qeyd edək ki, 2008-ci il üçün Azərbaycan hökuməti inflyasiyanı 18%, Beynəlxalq Valyuta Fondunun ekspertləri isə 20% səviyyəsində proqnozlaşdırsa da, inflyasiyanın səviyyəsi faktiki olaraq 20,8% təşkil edib. Cari ildə isə hökumət inflyasiyanın 12-14% səviyyəsində olacağını proqnozlaşdırır. Dövlət Statistika Komitəsinin proqnozlarına görə, 2009-cu ilin sonunda ölkədə nəinki bir rəqəmli inflyasiya, hətta deflyasiya müşahidə oluna bilər.