Maliyyə

Maliyyə

Son bir ildə Azərbaycanda maliyyə-kredit təşkilatları kreditləşməni 53% artırıb

19 fevral 2009 12:56 (UTC +04:00)

Bakı. Nicat Mustafayev – APA-Economics. Bu ilin yanvar ayının 1-dək Azərbaycanın maliyyə-kredit təşkilatları hüquqi və fiziki şəxslərə 7 163,3 mln. manat məbləğində və ya əvvəlki ilin analoji dövrü ilə müqayisədə 53% çox kredit verib.
Dövlət Statistika Komitəsindən «APA-Economics»ə verilən məlumata görə, kredit qoyuluşunun 42,3%-i dövlət, 55,3%-i özəl banklar, 2,4%-i qeyri-bank kredit təşkilatları tərəfindən həyata keçirilib.
Hesabat ilində uzunmüddətli kreditlərin həcmi 60,5% artaraq 4 867,4 mln. manata çatıb, onun ümumi kreditləşmədə xüsusi çəkisi isə 2008-ci ildəki 64,7%-dən 67,9%-dək yüksəlib.
Ödənilmə vaxtı keçmiş kreditlərin həcmi 159,8 mln. manat təşkil edib ki, bu da ümumi kreditləşmənin 2,2%-nə bərabərdir.

İqtisadiyyata kredit qoyuluşları:

	01.01.2009-cu il, mln. manat	2008-ci ilin eyni dövrü ilə müqayisədə (%)
Kredit qoyuluşları – cəmi	7 163,3	153,0
ondan:
- qısamüddətli	2 295,9	139,2
- uzunmüddətli	4 867,4	160,5
Ödənilmə vaxtı keçmiş kreditlər	159,8	159,3
Kreditlərin ümumi həcmində vaxtı keçmiş kreditlərin xüsusi çəkisi, %-lə	2,2	-

Qeyd edək ki, Azərbaycan Milli Bankın təqdim etdiyi məlumata görə, 2009-cu ilin yanvar ayında dövriyyəyə 1 160,4 mln. manat pul kütləsi buraxılıb, dövriyyədən bankların kassalarına 1,433 mlrd. manat daxil olub və 291 mln. manat vəsait ehtiyat fonduna qoyulub.