Maliyyə

Maliyyə

Azərbaycanda korporativ qiymətli kağızların emissiyası son bir ildə 33% azalıb

20 fevral 2009 07:43 (UTC +04:00)

Bakı. Vüqar İsrafilov – APA-Economics. Bu ilin fevral ayında Azərbaycanın korporativ qiymətli kağızlar bazarında qeydə alınan buraxılışların ümumi həcmi cəmi 2 mln. manat təşkil edib. Bu barədə «APA-Economics»ə Qiymətli Kağızlar üzrə Dövlət Komitəsindən (QKDK) məlumat verilib.
QKDK-nin məlumatına görə, fevralda Komitə tərəfindən yalnız bir emissiya qeydə alınıb - «Məmmədov & Ko.» qapalı səhmdar cəmiyyəti. Bu şirkətin buraxdığı 2 000 səhmin hər birinin nominal dəyəri 1 manat təşkil edir.
Yanvar ayı ilə müqayisədə korporativ fond bazarında məcmu emissiyanın həcmi 9,9 dəfə düşüb. Ötən ay QKDK tərəfindən qeydə alınan korporativ qiymətli kağızlar emissiyalarının ümumi həcmi 19,780 mln. manata bərabər olub. Bu məbləğin 25,3%-i «Gəncəbank» ASC-nin 20 manat nominal dəyəri ilə buraxdığı 250 min səhm emissiyasının payına düşür. Qalan həcm isə «Xalq Sıqorta» Səhmdar Cəmiyyətinin 7,390 mln. səhm emissiyası (1 səhmin nominal dəyəri - 2 manat) ilə bağlı olub.
Beləliklə, bu il korporativ qiymətli kağızların məcmu emissiyası ümumilikdə 21,78 mln. manata çatıb, halbuki 2008-ci ilin yanvar-fevral aylarında analoji göstərici 32,456 mln. manata bərabər olub. Son bir ildə QKDK-nın məlumatına görə, müvafiq emissiyaların nominal həcmi 32,9% və yaxud 10,676 mln. manat azalıb.