Maliyyə

Maliyyə

Ötən ay Azərbaycanın xarici ticarət dövriyyəsində 162 722,1 min dollar müsbət saldo yaranıb

21 fevral 2009 11:55 (UTC +04:00)

Bakı. Rəşad Süleymanov - APA. Cari ilin yanvar ayında Azərbaycanın xarici ticarət dövriyyəsində 162 722,1 min ABŞ dolları dəyərində müsbət saldo yaranıb. Dövlət Gömrük Komitəsindən APA-ya verilən məlumata görə, yanvar ayı ərzində 92 ölkə ilə aparılan ticarət əməliyyatlarının həcmi 1 200 269,7 min dolları olub. Bu müddət ərzində 681 495,9 min dollar mal ixrac, 518 773,8 min dollar dəyərində mal isə idxal edilib. O cümlədən, respublikaya 4 281,1 min dolları dəyərində 58,7 ton əmtəə dövlət, hökumət və beynəlxalq təşkilatların xətti ilə təmənnasız kömək, humanitar yük və texniki yardım kimi daxil olub.

Ötən ilin yanvarına nisbətən ixrac əməliyyatlarının həcmi 8,87%, idxal əməliyyatlarının həcmi isə 4,63% artıb. Hesabat dövründə Azərbaycandan 5 856,8 min dollar dəyərində mal müvəqqəti ixrac, 19 129,2 min dollar dəyərində mal isə ölkəyə müvəqqəti idxal olunub.

İxracın strukturunda əsas yeri xam neft (82,10%), neft məhsulları (9,30%), bitki və heyvan mənşəli yağlar (1,38%), meyvə-tərəvəz (1,06%), idxalda isə maşın, elektrik aparatları, elektrotexniki avadanlıqlar (33,07%), nəqliyyat vasitələri və onların hissələri (16,86%), qara metallar və onlardan hazırlanan məmulatlar (12,71%) və s. mallar təşkil edib.

Yanvar ayında Azərbaycanın ən çox mal ixrac etdiyi ölkələr sırasında birinci üç yeri İtaliya (34,95%), ABŞ (11,36%), Fransa (10,62%), idxalda isə Rusiya (15,94%), Türkiyə (13,38%) və Almaniya (10,08%) tutub.

Qeyd edək ki, hesabat dövründə xarici ticarətlə 1522 hüquqi və 1071 fiziki şəxs məşğul olub. İxrac əməliyyatlarında dövlət sektorunun payı 94,11%, özəl sektorun payı 4,98%, fiziki şəxslərin payı isə 0,91% təşkil edib. İdxal əməliyyatları üzrə isə bu göstərici dövlət sektoru üzrə 30,67%, özəl sektor üzrə 65,31%, fiziki şəxslər üzrə isə 4,03% olub.