Maliyyə

Maliyyə

«Standard & Poor’s» Azərbaycanı banklara məhdud hökumət dəstəyi verməyə hazır olan ölkələr sırasına aid edib

25 fevral 2009 10:50 (UTC +04:00)

Bakı. Vüqar İsrafilov – APA-Economics. «Standard & Poor’s» beynəlxalq reytinq agentliyi Azərbaycanı bank sektora məhdud hökumət dəstəyi verməyə hazır olan ölkələr sırasına aid edib. Bu barədə «APA-Economics»ə «Standard & Poor’s» agentliyinin Moskva ofisinin nümayəndəsi Viktor Nikolski məlumat verib.
Reytinq agentliyinin yaydığı hesabata əsasən, Azərbaycan Nigeriya, Qvatemala, Belarus, Livan, Kosta-Rika və Vyetnamla bərabər bank və ölkə risklərinin təsnifatı üzrə (Banking Industry Country Risk Assessment - BİCRA) 9-cu qrupa daxil edilib. Sözü gedən «BİCRA» təsnifatına görə, milli bank sistemi dünyada hazırda ən zəif sayılan Ukrayna bank sektorundan bir pillə üstün, Rusiya və Qazaxıstan (8-ci qrup) banklarının ölkə riskləri ilə müqayisədə isə geridə qalır. Buna əsas səbəb kimi, «Standard & Poor’s»un ekspertləri bankların kredit fəaliyyətindəki tənəzzülü və onların likvidliyinin düşməsi amillərini göstərirlər. Hesabatda vurğulanır ki, Azərbaycan bank sistemi hələ də cavan, dollarlaşmaya məruz qalmış və fraqmentardır – bank xidmətləri bazarının 40%-i hələ də Azərbaycan Beynəlxalq Bankına (ABB - yeganə dövlət bankı) məxsusdur. Bununla belə, «Standard & Poor’s»da hesab edirlər ki, risk-menecment problemləri, ölkə iqtisadiyyatının neft amilindən asılılığına baxmayaraq, müsbət səviyyədə qalan makroiqtisadi göstəricilər və bankların xarici borcalmalardan o qədər də asılı olmaması gələcəkdə bank sisteminin dünya maliyyə böhranından az miqdarda zərər çəkməsinə dəlalət edir.
Proqnozlara əsasən, neft qiymətlərinin kəskin enməsi ölkə iqtisadiyyatının artım tempi 4%-ə düşəcək. Bu zaman bankların kredit portfellərinin artım templəri azala bilər. Bundan başqa, agentlik vurğulayır ki, bank aktivlərinin çox hissəsinin ABŞ dollarında qalması onları milli valyutanın az ehtimal olunan revalvasiyasından da asılı vəziyyətə qoyur.
Hesabatda həmçinin qeyd olunur ki, Azərbaycan bank sistemi üzrə kapitallaşma əmsalı orta hesabla 17%, aktivlərin gəlirliyi (ROA) isə 2,2% təşkil edir. Bu şəraitdə, xarici ekspertlərin fikrincə, ölkədə iqtisadi resessiyanın ən neqativ ssenari ilə inkişafı ehtimal olunan problemli aktivlərin payını artıra bilər. Hazırda bu göstərici 35-50% arasında qiymətləndirilir.