Maliyyə

Maliyyə

Azərbaycan Milli Bankının banklara qarşı tələbləri 2,4 dəfə artıb

26 fevral 2009 08:15 (UTC +04:00)

Bakı. Vahab Rzayev – APA-Economics. Azərbaycan Milli Bankının (AMB) banklara olan tələblərinin ümumi həcmi 2009-cu ilin fevralın 1-nə 234,1 mln. manat təşkil edib. «APA-Economics»in bildirdiyinə görə, bu barədə məlumat AMB-nin analitik balansında əks olunub. Ötən ilin müvafiq dövrü ilə müqayisədə həmin göstərici 2,4 dəfə artıb. Eyni zamanda, cari ilin yanvarında AMB-nin banklara qarşı tələbləri cəmi 0,6 mln. manat və ya 0,26% artıb.
AMB-nin analitik balansına əsasən, digər tərəfdən Milli Bankın kommersiya bankları ilə münasibətləri çərçivəsində passiv əməliyyatları olan notlar üzrə öhdəlikləri fevralın 1-nə 100,7 mln. manat təşkil edib ki, bu da il ərzində 2,1 dəfə, yanvarda isə 1,5 dəfə azalma deməkdir.
Qeyd edək ki, banklara tələblərin əsas artımı son üç ayda, notlar üzrə öhdəliklərin həcminin azalması isə əsasən bu ilin yanvarında müşahidə olunub. Belə ki, banklara tələblərin illik artımı 136,6 mln. manat təşkil etdiyi halda, noyabrdan bu göstərici 105,2 mln. manata bərabər olub. Paralel olaraq, notlar üzrə öhdəliklərin illik azalması 110,3 mln. manat, yanvarda isə 48,6 mln. manat təşkil edib.
Beləliklə, bu göstəricilər son zaman Milli Bankın banklardan kreditlərin cəlb etməsini azaltdığını və banklara kreditlərin verilməsini artırdığını göstərir. Öz növbəsində bu, bank sistemində bankların xarici öhdəliklər üzrə ödəniş aparması ilə əlaqədar olaraq likvidliyin azalmasının nəticəsidir. Həmin öhdəliklər üzrə ödənişlərin davam etməsi, hətta cari ildə onların artması ilə bağlı AMB-nin banklara tələbləri, yəni banklar tərəfindən Milli Bankdan kreditlərin cəld etməsinin artacağı gözlənilir. Uçot dərəcəsinin tarixi minimuma (illik 5%) endirilməsi bankların mərkəzləşdirilmiş borcalmalarının şərtləri yumşaldılıb.