Maliyyə

Maliyyə

«Azərdəmiryolbank»ın beynəlxalq ödəniş sistemləri üzrə plastik kartlarının sayı ötən il 42% artıb

26 fevral 2009 09:53 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankının (SKB) dövriyyədə olan aktiv plastik kartlarının sayı 68% artaraq bu ilin əvvəlinə 47 760-a çatıb.
Bankın baş ofisindən «APA-Economics»ə verilən məlumata görə, ötən il bank tərəfindən beynəlxalq ödəniş sistemləri üzrə 28 430 plastik kart emissiya edilib. Cari ilin yanvar ayının 1-nə isə beynəlxalq ödəniş sistemləri üzrə dövriyyədə olan kartların sayı 25 420 ədəd təşkil edib ki, bu da 2007-ci ilin nəticələri ilə müqayisədə 42% çoxdur.
Qeyd edək ki, hazırda bank «VISA International» və «MasterCard International» ödəniş sistemlərinin prinsipial üzvüdür. Bank POS-terminal və ATM üzrə bu sistemlərin ekvayerinqi (xarici banklar tərəfindən buraxılmış kartların ödəniş üçün qəbulu imkanı) hüququna malikdir.
Bankın müştərilərə təklif etdiyi kart xidmətləri sırasına «Express Card», «Pin Change» və «Card to Card» daxildir.
Xatırladaq ki, «Azərdəmiryolbank SKB-nin 850-yə yaxın səhmdarı var. Nizamnamə kapitalında «25%+1 səhm» zərfi Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Şirkətinə (FMO), 10% hüquqi şəxslərə, qalanı isə fiziki şəxslərə məxsusdur. «Azərdəmiryolbank» 1989-cu ildə təsis edilib və hazırda respublika üzrə 27 filialı, 39 bankomatı və 252 POS-terminalı fəaliyyət göstərir.
Cari ilin yanvar ayının 1-nə bankın aktivlərinin həcmi 224,698 mln. manat, kredit portfeli 168,592 mln. manat, depozit portfeli 49,497 mln. manat, məcmu kapitalı 37,398 mln. manat, o cümlədən nizamnamə kapitalı 13,40 mln. manat təşkil edib.