Maliyyə

Maliyyə

Azərbaycanın ən iri bank təşkilatı üzrə ROA əmsalı bu il 1,6 dəfə artacaq

02 mart 2009 09:08 (UTC +04:00)

Bakı. Vüqar İsrafilov – APA-Economics. Azərbaycan Beynəlxalq Bankı (ABB) 2009-cu il ərzində aktivlərini ən azı 15% artıraraq 5 mlrd. manata çatdırmağa planlaşdırır.
Bankın Bakıdakı baş ofisindən «APA-Economics»ə verilən məlumata görə, ABB-nin aktivləri üzrə gəlirlik əmsalının (ROA) bu il 3,1%-ə çatacağı gözlənilir, bu isə analoji ötən ilki göstəricidən 1,6 dəfə çoxdur.
Ölkədə və bölgədə aktivlərinə görə ən iri bank təşkilatı olan ABB ümumi rentabelliyini 27% səviyyəsində saxlamağa çalışacaq. Bu il bank qiymətli kağızlarla əməliyyatlarını genişləndirməyi nəzərdə tutub. Bu cür əməliyyatlar 2009-cu ildə 490 mln. manata çatdırıla bilər. Eyni zamanda, ABB-nin öhdəliklərinin 3,96 mlrd. manat, onların illik artım tempinin isə 17% təşkil edəcəyi gözlənilir. Bu zaman, xaricdən cəlb olunan vəsaitlərin xüsusi çəkisi 30% endiriləcək, fiziki şəxslərdən qəbul olunan depozitlərin payı isə 13%-dən 16%-dək artırılacaq. Nəticədə, əhalidən cəlb olunan vəsaitlərin həcmi 25% artaraq 497 mln. manatdan 621 mln. manata çatacaq.
Bankın kredit fəaliyyətində də konservativ yanaşma saxlanılacaq və nəticədə, kredit portfeli yalnız 13% artaraq 3,243 mlrd. manata çatdırılacaq. Buna baxmayaraq, ABB üzrə mənfəət göstəricisi ötən il ilə müqayisədə iki dəfə yüksələrək və 174 mln. manata çata bilər.