Maliyyə

Maliyyə

Azərbaycanın daha bir sığorta şirkəti ASC-yə çevrilib

03 mart 2009 09:02 (UTC +04:00)

Bakı. Elnur Hüseynquluyev – APA-Economics. Azərbaycanın «Paşa Sığorta» Qapalı Səhmdar Cəmiyyəti (QSC) hüquqi statusunu dəyişərək Açıq Səhmdar Cəmiyyətə (ASC) çevrilib.
Şirkətin baş direktoru Nofəl Rzayevin «APA-Economics»ə verdiyi məlumata görə, statusun dəyişməsi ilə bağlı şirkətin səhmdarları tərəfindən Mircamal Paşayev Direktorlar Şurasının sədri, Nofəl Rzayev isə İdarə Heyətinin sədri vəzifəsinə seçiliblər. Artıq bu qərarlar Maliyyə Nazirliyi tərəfindən də təsdiqlənib.
Xatırladaq ki, sığorta şirkətlərinin ASC-yə çevrilməsi ilə bağlı Maliyyə Nazirliyi tərəfindən bu ilin mart ayının 15-dək vaxt verilib. Həmin müddət bitdikdən sonra ASC formasında fəaliyyət göstərməyən sığorta şirkətlərinin lisenziyaları «Sığorta fəaliyyəti haqqında» qanuna müvafiq olaraq məhdudlaşdırılacaq və əlavə 6 ay vaxt veriləcək. Bu müddət ərzində də şirkət öz öhdəliyini yerinə yetirməzsə, onun lisenziyası tam ləğv ediləcək.
Qeyd edək ki, ölkədə fəaliyyət göstərən sığorta şirkətlərinin yalnız 3-ü («MBASK», «Beynəlxalq Sığorta Şirkəti» və «AİG Caspian») QSC və MMC statusu ilə fəaliyyət göstərir.
Hazırda Azərbaycanda 28 sığorta şirkəti fəaliyyət göstərir ki, bunların ötən il ərzində topladığı məcmu sığorta haqlarının həcmi 179,26 mln. manat, ödənişləri isə 49,81 mln. manat olub.
Xatırladaq ki, «Paşa Holding» Şirkətlər Qrupuna daxil olan «Paşa Sığorta» şirkəti 2006-cı ildən fəaliyyət göstərir. Ötən il ərzində şirkətin topladığı sığorta haqlarının həcmi 8,44 mln. manat, ödənişlər isə 0,94 mln. manat olub. Həmçinin, şirkətin məcmu daxilolmalarda xüsusi çəkisi 4,71%, ödənişlərdə isə 1,89% təşkil edib. Cari ilin yanvar ayının 1-nə şirkətin nizamnamə kapitalı 9 mln. manatdır.