Maliyyə

Maliyyə

Aprelin 23-də «Bank Respublika»nın səhmdarlarının ümumi yığıncağı keçiriləcək

05 mart 2009 07:19 (UTC +04:00)

Bakı. Nicat Mustafayev – APA-Economics. Bu ilin aprel ayının 23-də «Bank Respublika» Açıq Səhmdar Cəmiyyətinin səhmdarlarının növbəti ümumi yığıncağı keçiriləcək.
ASC-dən «APA-Economics»ə verilən məlumata görə, yığıncaqda 2008-ci ilin maliyyə hesabatı, 2008-ci ilin nəticələrinə görə xalis mənfəət hesabına ehtiyatların yaradılması və dividentlərin ödənilməsinin təsdiqlənməsi, Bankın səhmlərinin emissiyası hesabına nizamnamə kapitalının artırılması, nizamnaməyə əlavə və dəyişikliklərin edilməsinin təsdiqlənməsi, digər hüquqi şəxslərin kapitalında Bankın iştirakı, 2008-ci il üçün kənar audit yoxlamasının nəticələri, Müşahidə Şurasının yeni tərkibinin təyin edilməsi və bir sıra digər məsələlər müzakirəyə çıxarılacaq.
Xatırladaq ki, «Bank Respublika» 1992-ci ildən fəaliyyət göstərir. Almaniyanın DEG İnvestisiya Şirkəti və «Sparkassen International Development Trust» şirkəti 2005-ci ilin aprel ayında bankın nizamnamə kapitalında «25%+1 səhm» paketi alıb.
Cari ilin yanvar ayının 1-nə bankın aktivlərinin həcmi 387,875 mln. manat, kredit portfeli 260,367 mln. manat, depozit portfeli 135,816 mln. manat, məcmu kapitalı 43,299 mln. manat, o cümlədən nizamnamə kapitalı 22,580 mln. manat təşkil edib. Bankın respublika üzrə 21 filialı, 40 bankomatı və 290 POS-terminalı mövcuddur.