Maliyyə

Maliyyə

Müstəqil ekspertlər: Dünya iqtisadiyyatında enmə 2010-cu ildə başa çatacaq

05 mart 2009 08:37 (UTC +04:00)

Bakı. Vahab Rzayev – APA-Economics. Dünya iqtisadiyyatında enmə tendensiyası 2010-cu ilin sonuna qədər başa çatacaq. «APA-Economics»in məlumatına görə, «Charles Schwab» beynəlxalq investisiya şirkəti tərəfindən cari ilin yanvarın sonunda sorğuya cəlb olunmuş 1 200-dən artıq maliyyə məsləhətçilərinin 85%-i bu fikirdədir.
Sorğuda iştirak edənlərin 44%-i hesab edir ki, artıq 2009-cu ilin sonuna kimi iqtisadi geriləmənin səngiyəcəyi gözlənilir, 41%-i isə bu prosesin yalnız gələn ilin sonuna kimi baş verəcəyini mümkün sayır. Eyni zamanda, respondentlərin 15%-i dünya iqtisadiyyatının sağlaşmasının daha çox vaxt çəkəcəyini düşünür.
Qeyd edək ki, sorğuda iştirak edən maliyyə analitikləri təxminən 300 mlrd. ABŞ dolları həcmində aktivlərin idarəetməsi ilə məşğuldur. İndiki şəraitdə ən etibarlı investisiya predmeti kimi sabit gəlirliyə malik olan qiymətli kağızlar qiymətləndirilir. Yaxın gələcəkdə portfellərində dəyişmələri nəzərdə tutan maliyyə menecerlərinin 42%-i sabit gəlirliyə malik olan qiymətli kağızları, 38%-i ABŞ-ın iri korporasiyalarının səhmlərini, 14%-i inkişafda olan ölkələrin şirkətlərinin səhmlərini almaq niyyətindədir.
Maraqlıdır ki, sorğuda iştirak edənlərin əksəriyyəti hesab edir ki, fond bazarlarında enmə tendensiyalarının səngiməsi real sektorun və ümumi iqtisadiyyatın sağlaşmasından daha gec baş verəcək. Belə ki, ekspertlərin fikrincə, investisiya portfellərinin dəyərinin 2008-ci ilin səviyyəsinə çatması yalnız 2011-ci ilin sonunda mümkündür.