Maliyyə

Maliyyə

Martın sonunda «Kapital Bank»ın səhmdarlarının növbədənkənar yığıncağı keçiriləcək

06 mart 2009 10:47 (UTC +04:00)

Bakı. Vüqar İsrafilov – APA-Economics. Bu ilin mart ayının 31-də Azərbaycanın «Kapital Bank» Səhmdar Kommersiya Bankının (SKB) səhmdarlarının növbədənkənar ümumi yığıncağı keçiriləcək. Bu barədə «APA-Economics»ə bankın İdarə Heyətindən məlumat verilib.
Bankın 2008-ci ildə fəaliyyəti ilə bağlı hesabatlardan başqa, toplantının gündəliyinə daxil edilən məsələlərdən biri də «Kapital Bank»ın Müşahidə Şurası və Audit Komitəsinə yeni üzvlərin seçilməsidir. Qeyd edək ki, bu, 2007-2008-ci illər ərzində bankın kapitalında dövlət səhm payının tam özəlləşdirilməsindən sonra keçirilən ikinci yığıncaqdır. Ötən ilin dekabrında səhmdarların ümumi yığıncağında bankın yeni əsasnaməsi və strukturu təsdiqlənib. Eyni zamanda, Müşahidə Şurasına yeni sədr vəzifəsinə «Paşa Holdinq»in nümayəndəsi Vadim Şneyr seçilib.
Xatırladaq ki, «Kapital Bank» Azərbaycanın ilk bank təşkilatıdır və əmanət kassaları formasında 100 ildən çoxdur fəaliyyət göstərir. Bir müddət Birləşmiş Universal Səhmdar Bankı ticarət nişanı altında işləyən «Kapital Bank» üç dövlət bankı – Aqrar-Sənaye, Sənaye-İnvestisiya və Əmanət banklarının sağlam aktiv və öhdəliklərinin birləşdirilməsi əsasında yaradılıb.
Hazırda «Kapital Bank»ın səhmdarları rolunda «AtaHolding» (30%), «Paşa Holding» (30%), «Xalq Sığorta» (15%), «Azersun Holding» (10%), fiziki şəxslər (10%) və bankın əmək kollektivi (5%) çıxış edir.
Cari ilin yanvar ayının 1-nə bankın aktivlərinin həcmi 577,590 mln. manat, depozit portfeli 481,974 mln. manat, kredit portfeli 365,847 mln. manat, məcmu kapitalı 71,910 mln. manat, o cümlədən nizamnamə kapitalı 24 mln. manat təşkil edib. Hazırda bankın respublika üzrə 89 filialı, 298 bankomatı və 469 POS-terminalı fəaliyyət göstərir. Bank ötən ili 3,443 mln. manat mənfəətlə yekunlaşdırıb. Həmçinin, keçən «Fitch» agentliyi banka «sabit» proqnozu ilə uzunmüddətli (RDE) «B+» reytinqi, «B» qısamüddətli reytinqi, «D/E» fərdi reytinqi və «4» dəstək reytinqi verib. «Moody’s İnvestors Service» isə bankın xarici valyutada olan depozitlərin uzunmüddətli reytinqini «B1», manatla depozitləri uzunmüddətli «B1», qısamüddətli reytinqi «NP» və maliyyə dəstəyi reytinqini «E+» («sabit» proqqozla) qiymətləndirib.