Maliyyə

Maliyyə

Azərbaycanda pensiya islahatların davam etdirilməsinə daha 13,9 mln. manat xərclənəcək

06 mart 2009 13:55 (UTC +04:00)

Bakı. İlhamə İsabalayeva – APA. Dünya Bankının (DB) Azərbaycanda həyata keçirəcəyi beş illik «Sosial müdafiənin inkişafı Layihəsi» çərçivəsində ölkədə pensiya islahatlarının davam etdirilməsinə 13,925 mln. manat sərf ediləcək. APA-nın məlumatına görə, bunu Dövlət Sosial Müdafiə Fondunun (DSMF) sədri Səlim Müslümov bildirib.
Fond sədrinin sözlərinə görə, həmin vəsaitin 51%-i dövlət büdcəsindən sərf ediləcək, qalan 49%-i isə DB-nın krediti hesabına maliyyələşdiriləcək.
S.Müslümov bildirib ki, DSMF artıq DB ilə bir layihə həyata keçirib. Ümumi dəyəri 7 mln. manat olan həmin layihənin icrası bu il başa çatır. Layihənin ümumi dəyərinin 5,336 mln. manatı Dünya Bankının krediti, 1,677 mln. manatı isə dövlət tərəfindən maliyyələşdirilib: «Bu layihə uğurla başa çatdırılıb. Layihənin əhatə olunduğu 5 il ərzində müvafiq qanunvericilik bazası yaradılıb, pensiya islahatları konsepsiyasında nəzərdə tutulan tədbirlər həyata keçirilib, Fondun Mərkəzi Aparatı və yerli şöbələrində güclü maddi-texniki baza qurulub».
Qeyd edək ki, «Sosial müdafiənin inkişafı Layihəsi»nin (2009-2013-cü illər) icrasına artıq yaxın günlərdə başlanacaq. Layihə üç komponentdən ibarətdir, bura əmək bazarında islahatların aparılması, Əmək və Əhalinin Sosial Müdafiəsi Nazirliyinin potensialının artırılması və təhlükəsizlik şəbəkəsinin inkişafı, habelə pensiya sisteminin inkişafı (pensiya islahatları) daxildir.
Layihənin ümumi dəyəri 54,6 mln. ABŞ dolları həcmində qiymətləndirilir ki, bunun 27,9 mln. dolları Azərbaycan hökuməti, 26,7 mln. dolları isə Dünya Bankı tərəfindən ayrılacaq.
Qeyd edək ki, «Sosial müdafiənin inkişafı Layihəsi»nə dair Azərbaycan və DB arasında saziş 2008-ci ilin noyabr ayının 28-də imzalanıb.