Maliyyə

Maliyyə

«ABB-Moskva» yeni depozit kampaniyasına başlayıb

10 mart 2009 10:57 (UTC +04:00)

Bakı. Vüqar İsrafilov – APA-Economics. Azərbaycan Beynəlxalq Bankının (ABB) Rusiyadakı törəmə qurumu olan «ABB-Moskva» bankı martın 10-dan etibarən yeni əmanət növü üzrə vəsaitlərin qəbuluna başlayıb. Bu barədə «APA-Economics»ə ABB-dən məlumat verilib.

«Rasti do qoda» («Bir ilədək böyü») adlanan və cari ilin may ayının sonunadək açıq elan edilən yeni depozit proqramına uyğun olaraq, hər bir müştəri daha yüksək faiz dərəcələri ilə əmanət yerləşdirməklə yanaşı, bu vəsaitlərin il ərzində vaxtından əvvəl də ona qaytarılmasını tələb edən zaman yüksək gəlirlik əldə edə bilər. Rusiya rublu, ABŞ dolları və avroda açılan əmanətlər üzrə illik gəlirlik müvafiq olaraq 15%, 11% və 10% səviyyəsində müəyyənləşdirilib. Depozitin minimal məbləği 3000 rubl, 100 avro və yaxud 100 dollar təşkil edə bilər. Depozitdəki vəsait müddətindən əvvəl qaytarılan zaman əmanətlər üzrə faiz dərəcəsi 30 gün üçün illik 0,1%, 90 gün üçün 7,5-11%, 3-6 ay üçün 8-12,5%, 6-9 ay üçün 8,5-13% təşkil edəcək.

Eyni zamanda, depozitə yatırılan ilkin ödənişin məbləği 1,5 mln. rubl, 50 min dollar və yaxud 50 min avro olarsa, onun sahibi «VİP» müştərilər sırasına aid ediləcək və ona təklif olunan cari faiz dərəcəsinə daha 0,5 faiz bəndi əlavə ediləcək.

Maraqlıdır ki, əmanətin məbləği 3 mln. rubl, 100 min dollar və ya 100 min avroya çatanda müştərinin hər bir valyutada açdığı depozitin faizlərinə əlavə olaraq 1 faiz bəndi əlavə olunacaq.