Maliyyə

Maliyyə

Azərbaycanda kommersiya banklarının xarici öhdəlikləri 5,6% azalıb

11 mart 2009 12:57 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının xarici öhdəliklərin məcmu həcmi 2009-cu ilin fevral ayının 1-nə 2 034,5 mln. manat təşkil edib. Azərbaycan Milli Bankın (AMB) «APA-Economics»ə verilən məlumata əsasən, ötən ilin müvafiq dövrü ilə müqayisədə bu göstərici 2,1 dəfə artıb.
Eyni zamanda, yanvarda xarici öhdəliklərin həcmi 14 mln. manat və ya 0,7% azalıb. Ümumilikdə, kommersiya banklarının xarici öhdəliklərinin həcmi öz tarixi maksimumuna ötən ilin noyabrın 1-də çatıb və həmin tarixdən bu göstərici 120,7 mln. manat və ya 5,6% azalıb.
Dünya maliyyə və iqtisadi böhranla əlaqədar xarici öhdəliklər məsələsi Azərbaycan bank sistemində kəskin aktuallaşıb, çünki yerli banklar son iki il ərzində bu göstəricini təxminən 5 dəfə artırıb. Buna görə də, həm bu öhdəliklərin icrası, həm də xaricdən yenidən maliyyələşdirmənin cəlb edilməsi ilə bağlı yarana biləcək problemlər hazırda bank ictimaiyyətinin diqqət mərkəzindədir.
AMB və kommersiya bankları tərəfindən xarici öhdəliklərin ödənilməsi ilə heç bir problemlərin olmadığı vurğulansa da, dünya böhranı şəraitində xaricdən yenidən fondlaşmanın mümkünsüzlüyü etiraf edilir. Lakin bank sistemi üzrə açıqlanan statistika bunu müəyyən dərəcədə təkzib edir: yenidən maliyyələşmənin sıfıra enməsi fonunda xarici öhdəliklərin mütəmadi olaraq ödənilməsi şərti ilə kommersiya banklarının xarici öhdəlikləri həcminin azalması 14 mln. manatdan daha çox olmalıdır. Beləliklə, sözügedən göstəricilər ya xarici öhdəliklərin yerinə yetirilməsində problemlərin olduğunu, ya da xaricdən yenidən fondlaşmanın davam etdiyini göstərir.