Maliyyə

Maliyyə

«Muğan Bank» nizamnamə kapitalını 42% artırır

13 mart 2009 06:34 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) «Muğan Bank» Açıq Səhmdar Cəmiyyətinin (ASC) sənədsiz adlı adi səhmlərinin emissiya prospektini dövlət qeydiyyatına alıb.
QKDK-dan «APA-Economics»ə verilən məlumata görə, səhmlərin hər birinin nominal dəyəri 200 manat, sayı 25 min ədəd, emissiyanın ümumi həcmi isə 5 mln. manat təşkil edir. Emissiyanın kütləvi təklif üsulu ilə Bakı Fond Birjası (BFB) vasitəsilə yerləşdirilməsi planlaşdırılır.
«Muğan Bank»ın səhmlərinin yerləşdirilməsinə bu ilin martın 29-dan etibarən başlanacağı gözlənilir. Səhmlərin yerləşdirilməsində anderrayter rolunda «Texnika Capital Manacement» şirkəti çıxış edəcək.
Yerləşdirmə uğurla başa çatacağı təqdirdə, bankın nizamnamə kapitalı 41,6% artaraq 17 mln. manata çatacaq.
Xatırladaq ki, təsisçisi 4 yerli fiziki şəxs olan «Muğan Bank» SKB 1992-ci ildə yaradılıb. Cari ilin yanvar ayının 1-nə bankın aktivlərinin həcmi 100,747 mln. manat, kredit portfeli 66,40 mln. manat, depozit portfeli 39,986 mln. manat, məcmu kapitalı 14,871 mln. manat, o cümlədən nizamnamə kapitalı 12 mln. manat təşkil edib. Bankın ölkə üzrə 25 filialı, 26 bankomatı və 62 POS-terminalı mövcuddur.