Maliyyə

Maliyyə

Azərbaycanın pul bazarında milli valyutadakı vəsaitlər üzrə orta faiz dərəcələri əhəmiyyətli dərəcədə enməyə başlayıb

13 mart 2009 10:43 (UTC +04:00)

Bakı. Vüqar İsrafilov – APA-Economics. Azərbaycan banklararası bazarında milli valyutadakı kredit vəsaitləri üzrə orta faiz dərəcələri son bir həftə ərzində ilin əvvəlindən ilk dəfə olaraq əhəmiyyətli dərəcədə enib.

«APA-Economics»in Bakı Banklararası Valyuta Birjasının (BBVB) məlumatları əsasında bildirdiyinə görə, mart ayının 10-13-də banklararası manat kreditləri üzrə vəsaitlərin yerləşdirmə dərəcələri orta hesabla 1,392 faiz bəndi düşüb. Əvvəlki həftə ərzində dərəcələr 0,852 faiz bəndi artsa da, bu həftə faiz dərəcələri bütün manat kredit alətləri üzrə enib. Nəticədə, pul bazarının əsas indikatorlarından biri sayılan 90 günlük BakİBOR əmsalı illik 16,40%-dən 15,25%-dək düşüb. Eyni zamanda, ötən həftə ilə müqayisədə bankların mütəşəkkil pul bazarında manat vəsaitlərinin cəlbetmə dərəcələri əksər alətlər üzrə enməyə başlayıb və orta hesabla 1,04 faiz bəndi azalma qeyd alınıb: 90 günlük kreditlər üzrə BakİBİD pul indikatoru illik 10,20%-dən 9,58%-dək azalıb. Nəticədə, ilin əvvəlindən ilk dəfə olaraq pul bazarında ən çox işlənilən kredit faiz dərəcəsi (often used) 90 günlük kreditlər üzrə illik 13,30%-dan 12,42%-ə düşüb. Ümumi hesabda isə manat vəsaitlərinin yerləşdirmə və cəlbetmə dərəcələri 2,43 faiz bəndi yaxınlaşıb.

Qeyd edək ki, bankların faiz dərəcələri birjanın hesabladığı BakİBOR (Baku İnterbank Offer Rate) və BakİBİD (Baku İnterbank Bid Rate) göstəricilərində əksini tapıb.

Xatırladaq ki, Azərbaycan Milli Bankının təkrar maliyyələşdirmə dərəcəsi ayın əvvəlindən 3%-ə çatdırılıb. Qlobal iqtisadi böhranın dərinləşməsi ilə əlaqədar son bir neçə ay ərzində ölkədə makroiqtisadi və maliyyə sabitliyinin qorunması məqsədi ilə AMB-nin təkrar maliyyələşdirmə dərəcəsi beş dəfə azaldıb.

BakİBOR və BakİBİD - pul bazarında kreditlərin cəlb olunması və yerləşdirilməsi göstəriciləridir. Bu indikatorların hesablanması pul bazarının aparıcı bank-operatorları (market-meykerlər) tərəfindən elan edilən kreditlərin cəlb olunması və yerləşdirilməsi dərəcələri əsasında aparılır.