Maliyyə

Maliyyə

Azərbaycan dövlət büdcəsinin icrasında yaranan profisitin həcmi azalır

13 mart 2009 12:50 (UTC +04:00)

Bakı. Vüqar İsrafilov – APA-Economics. Azərbaycan dövlət büdcəsinin 2009-cu ilin yanvar ayında icrası nəticəsində 755,66 mln. manat həcmində profisit yaranıb. Bu barədə «APA-Economics»ə Maliyyə Nazirliyindən məlumat verilib.
Nazirliyin operativ məlumatlarına görə, bu ilin ilk ayı ərzində büdcə gəlirləri ilə xərcləri arasında qeydə alınan müsbət saldo ötən ilin yanvar ayındakı analoji göstəricidən 5,4% və yaxud 43,14 mln. manat azdır. Profisitin həcmi ÜDM-ə nisbətən 40,63% təşkil edir.
Dövlət büdcəsinin gəlirləri son bir ildə 89,9% artaraq hesabat dövründə 978,3 mln. manat təşkil edib. Büdcə gəlirlərinin 30%-i və ya 303 mln. manatı Vergilər Nazirliyinin daxilolmaları hesabına yerinə yetirilib. Vergilərin ödənilməsi hesabına gəlirlər ötən ilin yanvar ayı ilə müqayisədə 2,5 dəfə azalıb. Eyni zamanda, Dövlət Gömrük Komitəsi xətti ilə daxilolmaların həcmi 104 mln. manat, onların büdcə gəlirlərindəki xüsusi çəkisi 10,4% təşkil edib. Nəticədə, büdcə proqnozları hər iki dövlət qurumu üzrə müvafiq olaraq 63,6% və 100% səviyyəsində icra olunub. Xatırladaq ki, cari il üçün təsdiqlənən Azərbaycanın 2009-cu il dövlət büdcəsinin Vergilər Nazirliyi üzrə məcmu gəlirləri 5,75 mlrd. manat, Dövlət Gömrük Komitəsi üzrə isə 1,3 mlrd. manat səviyyəsində gözlənilir.
Yanvarda cəmi 241,5 mln. manat həcmində icra olunan dövlət büdcəsinin xərcləri əsasən sosial müdafiə tədbirləri və əhaliyə əmək haqqı, təqaüd və müavinətlərin ödənilməsi ilə bağlıdır. Bu məqsədlərə çəkilən büdcə xərcləri son bir ildə 8,6% azalıb - 208,5 mln. manatdan 192 mln. manatadək. Buna baxmayaraq, Maliyyə Nazirliyinin məlumatına görə, büdcə xərclərinin məcmu həcmi 2008-ci ilin yanvar ayı ilə müqayisədə 34,5% artıb.