Maliyyə

Maliyyə

Azərbaycan Milli Məclisi Nazirlər Kabinetinin 2008-ci ildəki fəaliyyəti ilə bağlı təqdim etdiyi hesabatı qəbul edib

13 mart 2009 16:37 (UTC +04:00)

Onun sözlərinə görə, qlobal maliyyə böhranı ilə bağlı qabaqlayıcı tədbirlər görülüb: “Əgər belə olmasaydı, Azərbaycan iqtisadiyyatı Ermənistan iqtisadiyyatı kimi çökə bilərdi”.

Deputat Musa Quliyev Gəncə-Naxçıvan təyyarə reysinin açılmasının vacib olduğunu deyib. Deputat, həmçinin dərman vasitələrinin qiymətinin bahalaşdığını, buna mövcud monopoliyanın təsir etdiyini deyib.

Millət vəkili İqbal Ağazadə hesabatda əks olunan rəqəmlərin hökumətin fəaliyyəti ilə heç bir əlaqəsi olmadığını deyib. Onun sözlərinə görə, Azərbaycanın bəzi dövlət komitələrinin fəaliyyəti hiss olunmur: “Elə dövlət komitələri var ki, Nazirlər Kabinetinin şöbəsi səviyyəsində də işləmir”. Deputat, həmçinin ölkənin bir çox sənaye müəssisələrində işçilərin 60 faizinin ixtisar edildiyini də bildirib: “Mən hökumətin fəaliyyətini qeyri-qənaətbəxş sayıram”.

Deputat Qənirə Paşayeva kənd təsərrüfatının inkişafına kreditlər ayrılmasının zəruri olduğunu deyib. Onun sözlərinə görə, vaxtilə Tovuzda geniş inkişaf etmiş üzümçülük yenidən dirçəldilməlidir: “Düşmənlə sərhəd rayonların əkin sahələrinin suvarılması üçün tikilən Ağdam Su Anbarının tikintisinin dayanmaq təhlükəsi var. Bu su anbarının inşası başa çatdırılmalı və həmin ərazilərdəki əkin sahələrinin suvarılma problemi həll edilməlidir”. Deputat eyni zamanda Quba məzarlığına da vəsait ayrılmasının vacib olduğunu diqqətə çatdırıb.

Millət vəkili Qüdrət Həsənquliyev sahibkarların uzunmüddətli kreditlərə ehtiyacı olduğunu deyib: “Regionlardakı istehsal və emal müəssisələri vergidə azad olunmalıdır. Nazirlər Kabinetində struktur islahatları aparılmalıdır”. Q. Həsənquliyev Azərbaycana İrandan qaçaqmalçılıq yolu ilə narkotik vasitələrin gətirildiyini və bunun qarşısının alınmasının zəruri olduğunu deyib.

Müzakirələrdən sonra Milli Bankın sədri Elmar Rüstəmov çıxış edərək qlobal maliyyə böhranı başlayandan sonra da Azərbaycan iqtisadiyyatında iki rəqəmli inkişafın olduğunu deyib. Onun sözlərinə görə, hökumətin antiböhran proqramı var və bu yaxın vaxtlarda ictimaiyyətə açıqlanacaq: “Azərbaycanın qlobal maliyyə böhranını neytrallaşdırmaq üçün çox ciddi imkanları var. Maliyyə böhranı pul kredit siyasətinin yumşaldılmasını tələb edir. Son beş ayda Milli Bank uçot dərəcəsini 15 faizdən 3 faizə qədər azaldıb. Banklar öz öhdəliklərini yerinə yetirir, likvidlik qorunur, valyuta ehtiyatları möhkəmdir. Neftin qiyməti hazırda 45 dollar ətrafındadır və bu bizi qane edir. Əgər neftin qiyməti bu səviyyədə davam edərsə, ilin sonuna 5-6 milyard dollar müsbət saldo yaranacaq. İpoteka mexanizmi üzərində düşünülür. Daşınmaz əmlak bazarında vəziyyət mürəkkəbdir. Əmanətlərin sığortalanması ilə bağlı mövcud olan 6 min manatlıq məbləğ isə bir neçə dəfə artırıla bilər. Hazırda dollarlaşma prosesi gedir ki, bu da psixoloji vəziyyətlə bağlıdır. Ötən il banklar 1 milyard dollar məbləğində xarici borc qaytarıblar. Bu il indiyə qədərki vaxt ərzində isə xarici borcların qaytarılması 200 milyon dollar təşkil edir. Bu da maliyyə sabitliyini göstərir”.

Müzakirələrdən sonra hökumətin hesabatı 102 leyinə, 8 nəfər əleyhinə olmaqla qəbul edilib.