Maliyyə

Maliyyə

Azərbaycanda yeni investisiya şirkəti yaradılıb

16 mart 2009 06:36 (UTC +04:00)

Bakı. Nicat Mustafayev – APA-Economics. Bakıda iqtisadi inkişaf naziri Şahin Mustafayevin sədrliyi ilə Azərbaycan İnvestisiya Şirkəti (AİŞ) Müşahidə Şurasının iclası keçirilib.
İqtisadi İnkişaf Nazirliyindən «APA-Economics»ə verilən məlumata görə, iclasda Küveyt Maliyyə Evinin törəmə şirkəti olan «Turkapital»ın və AİŞ-in təsisçiliyi ilə «Küveyt-Azərbaycan İnvestisiya Şirkəti» QSC-nin yaradılması layihəsi təsdiq edilib. Şirkətin nizamnamə kapitalı ilkin mərhələdə 500 min ABŞ dolları, səhmdarların iştirak payları isə 3/1-ə nisbəti ilə bölünüb: «Turkapital» - 75%, AİŞ - 25%.
Şirkətin nizamnamə kapitalının 2 il ərzində tədricən 20 mln. dollaradək artırılması nəzərdə tutulur. Nizamnamə kapitalının artırılması səhmdarların iştirak paylarına uyğun aparılacaq.
«Küveyt-Azərbaycan İnvestisiya Şirkəti» QSC iqtisadiyyatın müxtəlif sahələrinə xarici investisiyaların cəlb edilməsi və yerli müəssisələrə sərmayə qoyuluşlarını həyata keçirəcək.
Xatırladaq ki, 2008-ci ilin mart ayında AİŞ-in iştirakı ilə daha bir investisiya şirkəti - «Xəzər Beynəlxalq İnvestisiya Şirkəti» QSC dövlət qeydiyyatına alınıb. Əsasən logistika, aqro-biznes, biznes və ticarət mərkəzlərin inşası, ofis mebeli istehsalı, mehmanxanaların və soyuducu anbarların tikilməsi sahələrinə maraq göstərən şirkət 2007-ci ilin noyabrın sonunda İslam İnkişaf Korporasiyası və AİŞ-in iştirakı ilə təsis edilib. Bu şirkətdə AİŞ-in iştirak payı 20% (14 mln. dollar) təşkil edir.
Qeyd edək ki, AİŞ 2006-cı ilin mart ayında yaradılıb. Şirkətin investisiya fəaliyyətinin məqsədi əsasən ölkə iqtisadiyyatının qeyri-neft sahələrində fəaliyyət göstərən səhmdar cəmiyyətlərinin və digər kommersiya təşkilatlarının nizamnamə kapitalındakı iştirak payını, o cümlədən səhmlərini almaqla müddətli investisiya qoyuluşunun həyata keçirilməsindən ibarətdir. Hazırda AİŞ-in nizamnamə kapitalı 90 mln. manat təşkil edir.