Maliyyə

Ana səhifə

Maliyyə

Azərbaycanda mərkəzləşdirilmiş kreditləşmə ilin əvvəlindən 4% artıb

14 aprel 2009 14:06 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya bankları tərəfindən Milli Bankın (AMB) mərkəzləşdirilmiş kredit bazarından cəlb etmələrinin həcmi martın 1-nə 238,74 mln. manat təşkil edib. AMB-dən «APA-Economics»ə verilən məlumata əsasən, bu göstərici son bir ildə 2,5 dəfə artdığı halda, cari ilin əvvəlindən cəmi 4,3%-lik artım müşahidə olunub.
Xatırladaq ki, yanvarda mərkəzləşdirilmiş kreditlər üzrə faiz dərəcəsi 8%, fevralda isə artıq 5% təşkil edib. Ümumilikdə isə, dünyada maliyyə böhranın əlamətləri üzə çıxandan sonra Azərbaycanda uçot dərəcəsi 15%-dən hazırkı 3%-dək endirilib. Uçot dərəcəsinin endirilməsinin əsas məqsədi xaricdən fondlaşmanın məhdudlaşması şəraitində banklar üçün əlavə likvidliyin təmin edilməsi olub. Lakin, göründüyü kimi, banklar bu imkanlardan faydalanmağa tələsmir. Bu da öz növbəsində bankların xarici öhdəliklərinin yerinə yetirilməsində heç bir problemin olmadığını göstərir. Digər tərəfdən mərkəzləşdirilmiş kreditlərin azaldılan xaricdən maliyyələşməni əvəz etməsi kimi vəzifəsi də tam şəkildə icra olunmur ki, bu da bankların müvafiq tələbatının olmaması ilə izah oluna bilər. Nəticədə, AMB-nin bank sistemini əlavə likvidliklə təmin etməsi üçün istifadə oluna bilən mərkəzləşdirilmiş kreditlər bazarı hətta böhran şəraitində müəyyən səbəblərə görə istifadə olunmur və bu, Milli Bankın həmin alət vasitəsi ilə banklara dəstək verməsinə hazır olması barədə dəfələrlə edilən bəyanatları nəzərə alaraq, bank sistemi üçün yalnız müsbət hal kimi qiymətləndirilməlidir.