Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsinin sədri AYİB-in ekspertləri ilə görüşüb

15 aprel 2009 08:43 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsinin (QKDK) sədri Rüfət Aslanlı Avropa Yenidənqurma və İnkişaf Bankının (AYİB) maliyyə dəstəyi ilə Bakı Fond Birjasında (BFB) həyata keçirilən «Kapital bazarları üzrə treninq» layihəsinin Bakıda səfərdə olan nümayəndə heyəti ilə görüşüb.
QKDK-dan «APA-Economics»ə verilən məlumata görə, R.Aslanlı ilə görüşdə yerli fond bazarının mövcud durumu, qiymətli kağızlar bazarının infrastrukturunun inkişafı sahəsində əməkdaşlıq imkanları və layihəyə dair Ehtiyacların Qiymətləndirilməsi Hesabatının hazırlanması geniş müzakirə olunub, layihənin növbəti mərhələlərində xarici ekspertlər tərəfindən müvafiq mövzular üzrə treninqlərin aparılmasının məqsədəuyğunluğu vurğulanıb. Komitənin sədri sözügedən layihənin Azərbaycan qiymətli kağızlar bazarının peşəkar iştirakçılarının potensialının artırılması, eləcə də bazar infrastrukturunun institusionallaşdırılması və optimallaşdırılması baxımından əhəmiyyətini qeyd edib, benefisiarların ekspertlərin verəcəyi faydalı tövsiyələrdən yararlanacağına ümid etdiyini bildirib.
Qeyd edək ki, layihə çərçivəsində ABŞ-ın «Financial Markets International» (FMI) şirkətinin nümayəndələri Çarlz Siqer, Con Hardi və Ceremi Krips BFB ilə tanış olub, Bakıda olacaqları müddət ərzində BFB-dan əlavə Milli Depozit Mərkəzi, yerli broker şirkətləri və digər təşkilatlarla bir sıra görüşlərin nəzərdə tutulduğunu qeyd ediblər.