Maliyyə

Ana səhifə

Maliyyə

«ABB-Moskva» bankı xidmətlərin çeşidini genişləndirir

15 aprel 2009 10:58 (UTC +04:00)

Moskva. Roman Ağayev, Vüqar İsrafilov – APA-Economics. Azərbaycan Beynəlxalq Bankının Rusiyada fəaliyyət göstərən törəmə qurumu - «ABB-Moskva» bankı fiziki şəxslərə göstərdiyi xidmətlərin çeşidini genişləndirməyi planlaşdırır. Bu barədə «APA-Economics»ə verdiyi açıqlamasında törəmə bankın İdarə Heyətinin sədri Fuad Abdullayev bildirib.
F.Abdullayevin sözlərinə görə, «ABB-Moskva»nın bu sahədə seçdiyi prioritetlərdən biri Rusiya ilə Azərbaycan arasında təşkil etdiyi pul köçürmələridir. Hazırda fiziki şəxslər tərəfindən ən kütləvi və tələb olunan xidmət növlərindən sayılan pul köçürmələrinin həcmi 2008-ci ildə 14% artaraq 113 mln. ABŞ dollarına çatıb. Bu zaman köçürmələrin say baxımından 6% artması müşahidə olunub və onların ümumi sayı 67 min təşkil edib. Törəmə bankın rəhbəri xüsusi ilə qeyd edir ki, pul köçürmələrinin genişlənməsi «ABB-Moskva»nın sosial əhəmiyyət kəsb edən işlərdən biridir. Köçürmələrin hesab açmadan real vaxt rejimində uğurla həyata keçirilməsi isə F.Abdullayevin fikrincə, daha çox ana bankın Azərbaycanda geniş xidmət şəbəkəsinə malik olması ilə əlaqəlidir. Bu kontekstdə o, yeni «ABB-Ekspress» pul köçürmələri üzrə xidmətin açılmasını xüsusilə vurğulayıb. F.Abdullayev hesab edir ki, «ABB-Ekspress» ödəniş sisteminin tətbiqi müştərilərə köçürmələri daha tez, rahat və optimal rejimdə həyata keçirməyə imkan verir.
Eyni zamanda, «ABB-Moskva»nın sədri qeyd edib ki, fiziki şəxslər üçün nəzərdə tutulan depozit proqramları da genişlənir. Belə ki, 2008-ci ildə bankın ev təsərrüfatları hesabına toplanan depozit portfeli 88% artaraq 725 mln. rubla və yaxud 24,716 mln. ABŞ dollarına bərabər olub. Bu sahədə yalnız artım gözləyən «ABB-Moskva» həmçinin kredit kartlarının emissiyasını artırır. İlin əvvəlinə bank tərəfindən 17 minə yaxın «Viza» və «MasterCard» ödəniş sistemlərinin plastik kartları buraxılıb və bu səbəbdən bank tərəfindən cari ildə bankomatların sayı 73%, POS-terminallar isə 92% artırılacaq.
Qeyd edək ki, 7 ildən artıq Rusiyada işləyən Azərbaycan bankının xidmət şəbəkəsi əsasən Moskva, Moskva vilayəti, Peterburq və Yekaterinburq şəhərlərini əhatə edir. Bu bölgələrdə ilk filial və xidmət şöbələrinin açılması orada yaşayan və iqtisadi cəhətdən daha fəal olan azərbaycanlı əmək miqrantlarının olması ilə bağlıdır.
Xatırladaq ki, «ABB-Moskva» Rusiyada dinamik artım templəri ilə seçilən kredit təsisatlarından biridir. Bank Rusiyanın ən iri 200 bankı sırasına daxil olub (171-ci yer) və ötən il vergi ödənilənədək əldə etdiyi mənfəəti 164 mln. rubl və yaxud 5,6 mln. dollar təşkil edib. Bankın kapitalı 1,012 mlrd. rubl (34,5 mln. dollar), aktivləri isə 9,86 mlrd. rubl və yaxud 335,53 mln. dollara bərabərdir.