Maliyyə

Ana səhifə

Maliyyə

«MBASK» sığorta şirkəti son bir ildə ödənişlərinin həcmini 36% artırıb

15 aprel 2009 12:27 (UTC +04:00)

Bakı. Elnur Hüseynquluyev – APA-Economics. Azərbaycanın «MBASK» sığorta şirkətinin 2009-cu ilin yanvar-mart aylarında topladığı sığorta haqlarının həcmi 2,073 mln. təşkil edib ki, bu da ötən ilin analoji dövrü ilə müqayisədə təxminən 2 dəfə azdır.
Şirkətin baş ofisindən «APA-Economics»ə verilən məlumata görə, hesabat dövründə sığorta riskləri üzrə ödənişlərin həcmi 36% artaraq 1,370 mln. manata çatıb.
Daxilolmaların strukturunda ən çox sığorta haqqı «Əmlak sığortası» (645,6 min manat), «Avtomobil sığortası» (536,2 min manat) və «Bədbəxt hadisələrin sığortası» (451,1 min manat) növləri üzrə toplanılıb. Bu növlərin məcmu daxilolmalarda payı müvafiq olaraq 31%, 26% və 22% təşkil edib.
Ödənişlərə gəldikdə isə, ən çox vəsait ənənəvi olaraq «Avtomobil sığortası» (977,0 min manat), «Tibbi sığorta» (215,8 min manat), «Bədbəxt hadisələrin sığortası» (56,3 min manat), «Xaricə gedən şəxslərin sığortası» (31,020 min manat) və «Yanğından sığorta» (29,8 min manat) növləri üzrə ödənilib. Məcmu ödənişlərdə «Avtomobil sığortası»nın xüsusi çəkisi 71,3%, «Tibbi sığorta»nın payı isə 15,7%-ə bərabər olub.
Qeyd edək ki, bu ilin I rübü ərzində şirkətin bir sığorta polisi üzrə ən iri ödənişi avtomobil sığortası növü üzrə olub və 23,259 min manat təşkil edib.
Xatırladaq ki, «MBASK» sığorta şirkəti 1992-ci ildən fəaliyyət göstərir. Şirkətin təsisçiləri rolunda Avropa Yenidənqurma və İnkişaf Bankı (30%) və fiziki şəxslər çıxış edir. Cari ilin aprel ayının 1-nə şirkətin nizamnamə kapitalı 2 mln. manat təşkil edib. Hazırda şirkət 29 sığorta növü üzrə xidmət göstərir.