Maliyyə

Ana səhifə

Maliyyə

Azərbaycanın borc qiymətli kağızlar bazarının həcmi bu ilin I rübündə 16% azalıb

16 aprel 2009 07:21 (UTC +04:00)

Bakı. Nicat Mustafayev – APA-Economics. Bu ilin I rübü ərzində Azərbaycanın borc bazarı əsasən dövlət borc alətləri hesabına aktivliyini saxlayıb.
Qiymətli Kağızlar üzrə Dövlət Komitəsindən «APA-Economics»ə verilən məlumata görə, rüb ərzində borc qiymətli kağızlar bazarının ümumi həcmi 1,75 mlrd. manat olub ki, bu da 2008-ci ilin müvafiq göstəricisindən 16% azdır.
Borc bazarının ümumi həcminin 86%-ni Milli Bankın qısamüddətli notları, 13,8%-ni dövlət qısamüddətli istiqrazlar (DQİ) ilə aparılan əməliyyatlar təşkil edib.
Hesabat dövründə DQİ buraxılışı 2008-ci ilin ilk rübü ilə müqayisədə 66% artaraq 105,7 mln. manata çatıb. Təkrar bazarda DQİ-lər üzrə aparılan alqı-satqı əməliyyatlarının sayı və məbləğində yüksək artım tempi müşahidə olunub. Bu dövrdə dövlət istiqrazları üzrə əməliyyatların məbləği ötən ilin müvafiq dövrü ilə müqayisədə 266 dəfə artıb və ilk dəfə olaraq ilkin bazarın məbləğini ötüb.
Hesabat dövründə pul siyasətinin yumşaldılması nəticəsində Milli Bankın notlarının buraxılış həcmi keçən ilin müvafiq dövrü ilə müqayisədə 70% azalaraq 162,4 mln. manat təşkil edib. Təhlil olunan dövr ərzində Milli Bankın notları ilə həyata keçirilmiş repo və əks-repo əməliyyatlarının həcmi 1,26 mlrd. manat olub ki, bu da 2008-ci ilin müvafiq dövrü ilə müqayisədə 8% azdır. Dövlət istiqrazları ilə repo əməliyyatlarının həcmi isə 21 mln. manat olub və ötən ilin analoji dövrü ilə müqayisədə 3,2 dəfə artıb.