Maliyyə

Ana səhifə

Maliyyə

Azərbaycanda təkrar qiymətli kağızlar bazarı ilkin bazarı 4,4 dəfə üstələyir

16 aprel 2009 11:14 (UTC +04:00)

Bakı. Nicat Mustafayev – APA-Economics. Bu ilin I rübündə Azərbaycan qiymətli kağızlar bazarının həcmi 1,88 mlrd. manat təşkil edib ki, bunun da əsas hissəsini borc bazarı alətləri təşkil edib.
Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, ümumi bazarın 18,5%-i ilkin, 81,5%-i isə təkrar bazarın payına düşür. Hesabat dövründə qiymətli kağız buraxılışı 347,7 mln. manat məbləğində olub ki, bunun da 47%-ni Milli Bankın notları təşkil edib.
Hesabat dövrü ərzində təkrar bazarın həcmi keçən ilin müvafiq dövrü ilə müqayisədə 1,7% artaraq 1,536 mlrd. manat olub. Bunun da 82,4%-i Milli Bankın notları ilə aparılan repo və əks-repo əməliyyatlarının payına düşüb.
Bundan başqa, hesabat dövründə bir peşəkar iştirakçının broker fəaliyyəti üzrə xüsusi razılığının (lisenziyasının) qüvvədə olma müddəti bitib, bir broker və bir diler fəaliyyəti dayandırılıb, broker və diler fəaliyyətlərinin hər biri üzrə bir xüsusi razılığın (lisenziyalarının) fəaliyyəti bərpa edilib və bununla da qüvvədə olan qiymətli kağızlar bazarında peşəkar fəaliyyətin həyata keçirilməsinə dair xüsusi razılıqların (lisenziyaların) sayı 31 ədəd təşkil edib.
Həmçinin, yanvar-mart aylarında QKDK tərəfindən qiymətli kağızlar bazarında peşəkar fəaliyyət növləri ilə məşğul olmaq üçün 20 ixtisas şəhadətnaməsi verilib.